రాజీనామా చెయ్యండి: ఎన్సీపీ యువత అధినేతపై అజిత్ పవార్ చర్య
మహారాష్ట్ర రాజకీయాలలో గందరగోళ పరిస్థితులు మళ్లీ తలెత్తాయి. నేషనలిస్ట్ కాంగ్రెస్ పార్టీ (NCP) లో ఓ కీలక పరిణామం చోటుచేసుకుంది. ఎన్సీపీ యువజన విభాగం అధ్యక్షుడు సూరజ్ చవాన్ తన పదవికి రాజీనామా చేయాల్సిందిగా పార్టీ అధినేత, రాష్ట్ర ఉప ముఖ్యమంత్రి అజిత్ పవార్ స్పష్టమైన ఆదేశాలు జారీ చేశారు. పార్టీ దిశానిర్దేశాలకు విరుద్ధంగా వ్యవహరించినందుకుగాను ఈ నిర్ణయం తీసుకున్నారు.
ఇటీవల జరిగిన ఓ సంఘటన నేపథ్యంలో ఈ చర్య తీసుకున్నట్టు సమాచారం. అసెంబ్లీ వర్షాకాల సమావేశాల సమయంలో వ్యవసాయ శాఖ మంత్రి మాణిక్రావు కకడే మొబైల్ ఫోన్లో పేకాట ఆడుతున్న వీడియో సోషల్ మీడియాలో వైరల్ అయింది. ఈ వీడియోపై తీవ్ర వ్యతిరేకత వ్యక్తమవుతున్న సమయంలో, ఎన్సీపీ రాష్ట్ర అధ్యక్షుడు సునీల్ తట్కారే మీడియా సమావేశం నిర్వహించారు. అదే సమయంలో ఛవా సంఘటన్ కార్యకర్తలు పేకాట ఆడుతూ మాణిక్రావుపై వ్యంగ్యంగా నిరసన తెలిపారు. (NCP)
ఈ నిరసనలపై, సూరజ్ చవాన్ ఆధ్వర్యంలోని ఎన్సీపీ యువజన విభాగం కార్యకర్తలు ఘర్షణకు దిగారు. నిరసన చేస్తున్న కార్యకర్తలపై దాడికి పాల్పడి వారిని తీవ్రంగా కొట్టారు. ఈ ఘటనపై తీవ్ర స్పందన వ్యక్తం చేసిన ఉప ముఖ్యమంత్రి అజిత్ పవార్, పార్టీ నిబంధనలకు వ్యతిరేకంగా వ్యవహరించిన సూరజ్ చవాన్పై చర్యలు తీసుకుంటూ, అతను వెంటనే తన పదవికి రాజీనామా చేయాలని ఆదేశించారు.
ఈ చర్యతోపాటు, పార్టీలో క్రమశిక్షణ అమలులో ఉన్నదని, ఎవరు అయినా పార్టీ విలువలకు భంగం కలిగిస్తే ఉపేక్షించబోమని పవార్ స్పష్టం చేశారు. పార్టీ పరువు, ప్రజలలో నమ్మకాన్ని దెబ్బతీసేలా జరిగే ఏ చర్యనైనా తాను సహించబోనని తెలిపారు.
ఈ పరిణామాల నేపథ్యంలో మహారాష్ట్ర రాజకీయ వర్గాల్లో కలకలం రేగింది. ఎన్సీపీ వర్గాలలో కూడా ఈ ఘటనపై చర్చలు మొదలయ్యాయి. పార్టీ పరిపాలనా నైతికతకు నిదర్శనంగా అజిత్ పవార్ తీసుకున్న ఈ నిర్ణయం రాజకీయంగా ప్రాధాన్యతను సంతరించుకుంది.
Also Read :