తెలంగాణలో మావోయిస్టు (MaoistSujatha) ఉద్యమానికి గట్టి ఎదురుదెబ్బ తగిలింది. మావోయిస్టు పార్టీ కేంద్ర కమిటీ సభ్యురాలు, ప్రముఖ నేత పోతుల కల్పన అలియాస్ సుజాత (MaoistSujatha) డీజీపీ జితేందర్ ఎదుట అధికారులకు లొంగిపోయారు. గద్వాల జిల్లా గట్టు మండలం పెంచికల్ పేట గ్రామానికి చెందిన సుజాత, ప్రస్తుతం మావోయిస్టు పార్టీ కేంద్ర కమిటీలో ఉన్న ఏకైక మహిళా నాయకురాలిగా గుర్తింపు పొందారు.
సుజాత మావోయిస్టు పార్టీ అగ్రనేత కిషన్జీ భార్య. కిషన్జీ 2011లో పశ్చిమ బెంగాల్లో జరిగిన ఎన్కౌంటర్లో మృతి చెందగా, ఆ తర్వాత నుంచి సుజాత మావోయిస్టు నాయకత్వంలో కీలక పాత్ర పోషించారు. ఛత్తీస్గఢ్ సౌత్ సబ్ జోనల్ బ్యూరో ఇన్చార్జ్గా పనిచేస్తున్న ఆమె 43 ఏళ్లుగా అజ్ఞాతం జీవితం గడిపారు.
పోలీసుల రికార్డుల ప్రకారం, సుజాతపై 106 కేసులు నమోదయ్యాయి. ఆమెపై రూ.1 కోటి రివార్డు కూడా ప్రకటించబడింది. డీజీపీ జితేందర్ మాట్లాడుతూ – “మావోయిస్టులు తమ హింసా మార్గాన్ని వదిలి జనజీవన స్రవంతిలోకి రావాలి. సుజాత కూడా అదే నిర్ణయం తీసుకోవడం ఒక సానుకూల పరిణామం” అని అన్నారు.
సుజాత మొదట్లో ఆర్ఎస్యూ, జన నాట్యమండలిలో పని చేశారు. 1996లో కమాండర్గా, 2001లో రాష్ట్ర కమిటీ సభ్యురాలిగా పనిచేశారు. అనారోగ్య సమస్యలు, పెరుగుతున్న ఒత్తిడి కారణంగా ఆమె బయటికి రావాల్సి వచ్చిందని పోలీసులు తెలిపారు. అధికారుల ప్రకారం, లొంగుబాటుకు గుర్తింపుగా ఆమెకు రూ.25 లక్షల రివార్డు అందజేశారు.
డీజీపీ వివరాల ప్రకారం, ఈ ఏడాది ఇప్పటి వరకు 404 మంది యూజీ క్యాడర్లు, నలుగురు రాష్ట్ర కమిటీ సభ్యులు, ఒక డివిజన్ కమిటీ కార్యదర్శి, 8 మంది డివిజనల్ కమిటీ సభ్యులు, 34 మంది ఏరియా కమిటీ సభ్యులు పోలీసుల ఎదుట లొంగిపోయారు. ఈ లొంగుబాట్లు మావోయిస్టు కార్యకలాపాలు క్రమంగా బలహీనమవుతున్న సంకేతమని అధికారులు భావిస్తున్నారు.
సుజాత లొంగుబాటు మావోయిస్టు ఉద్యమానికి ఒక పెద్ద దెబ్బగా భావించబడుతోంది. తెలంగాణలో శాంతి వాతావరణం నెలకొనే దిశగా ఇది మరొక కీలక అడుగని విశ్లేషకులు పేర్కొంటున్నారు.
Also read: