మోంతా తుఫాన్ ప్రభావం ఆంధ్రప్రదేశ్పై తీవ్రంగా పడింది. ఈ తుఫాన్ కారణంగా రాష్ట్రంలోని మూడు ప్రధాన (Airports) విమానాశ్రయాలైన విశాఖపట్నం, విజయవాడ, తిరుపతి విమాన సర్వీసులు పూర్తిగా దెబ్బతిన్నాయి. వాతావరణ పరిస్థితులు అనుకూలంగా లేకపోవడంతో పలు దేశీయ, అంతర్జాతీయ (Airports) విమానాలు రద్దయ్యాయి.
విశాఖపట్నం విమానాశ్రయంలో ఈ రోజు ఒక్క విమానమూ నడవలేదని విమానాశ్రయ డైరెక్టర్ ఎన్. పురుషోత్తమ్ తెలిపారు. ఆయన మాట్లాడుతూ — “రోజు సగటున 30 నుంచి 32 విమానాల రాకపోకలు జరుగుతాయి. అయితే ఈ రోజు తుఫాన్ ప్రభావం వల్ల అన్ని విమాన సర్వీసులు రద్దు అయ్యాయి” అని చెప్పారు. అక్టోబర్ 27న రెండు ఎయిర్ ఇండియా ఎక్స్ప్రెస్ విమానాలు రద్దు చేసినప్పటికీ, మిగిలినవి నడిచాయని చెప్పారు. కానీ మోంతా తుఫాన్ తీవ్రత పెరగడంతో ఈ రోజు మొత్తం విమాన రాకపోకలు నిలిపివేసినట్టు వెల్లడించారు.
తుఫాన్ దృష్ట్యా విశాఖ విమానాశ్రయం భద్రతకు ప్రత్యేక చర్యలు తీసుకున్నామని పురుషోత్తమ్ తెలిపారు. ఎయిర్పోర్ట్ అథారిటీ ఆఫ్ ఇండియా (AAI) సూచనల మేరకు తుఫాన్ ముందు మరియు తర్వాత పరిస్థితులపై పూర్తి అప్రమత్తతతో వ్యవహరిస్తున్నామన్నారు. విమానాశ్రయ భవనాలు, రన్వేలు, కమ్యూనికేషన్ సిస్టమ్స్ అన్నీ రక్షణలో ఉన్నాయని వివరించారు.
విజయవాడ విమానాశ్రయంలో కూడా తుఫాన్ ప్రభావం స్పష్టంగా కనిపించింది. ఈ రోజు కేవలం ఐదు విమానాలు మాత్రమే నడపగలిగారని, మరో 16 విమానాలు రద్దు చేయాల్సి వచ్చిందని విమానాశ్రయ డైరెక్టర్ లక్ష్మీకాంత్ రెడ్డి తెలిపారు. ఆయన మాట్లాడుతూ — “నిన్న ఒక్క విమానం మాత్రమే రద్దయింది. కానీ ఈ రోజు ఢిల్లీ, ముంబై, చెన్నై, హైదరాబాద్ వంటి ప్రధాన నగరాలకు వెళ్ళే పలు విమానాలు రద్దయ్యాయి” అని చెప్పారు.
రేపటి వాతావరణ పరిస్థితులపై ఆధారపడి మాత్రమే తదుపరి విమాన సర్వీసులు తిరిగి ప్రారంభిస్తామన్నారు. “మోంతా తుఫాన్ దిశ మారకపోతే, రేపటికి కూడా విమాన సర్వీసులు పరిమిత స్థాయిలోనే నడిచే అవకాశం ఉంది” అని రెడ్డి తెలిపారు.
ఇదిలా ఉండగా, తిరుపతి విమానాశ్రయంలోనూ నాలుగు విమానాలు రద్దు చేసినట్టు సమాచారం. బలమైన ఈదురుగాలులు, భారీ వర్షాల కారణంగా విమానాల టేకాఫ్ మరియు ల్యాండింగ్కు ఇబ్బందులు ఏర్పడుతున్నాయని అధికారులు తెలిపారు. తిరుపతి నుండి హైదరాబాద్, బెంగళూరు, చెన్నై రూట్లలో విమానాలు నిలిపివేయబడ్డాయి.
మోంతా తుఫాన్ తీర ప్రాంతాల్లో ఇప్పటికే వర్షాలు ప్రారంభమయ్యాయి. వాతావరణ శాఖ హెచ్చరికల మేరకు అధికారులు అన్ని విమానాశ్రయాల్లో అప్రమత్తంగా ఉన్నారు. ప్రయాణికులకు విమాన సంస్థలు SMS మరియు ఇమెయిల్ ద్వారా సమాచారం అందిస్తున్నాయి.
తుఫాన్ ప్రభావం తగ్గిన వెంటనే విమాన సర్వీసులు తిరిగి పునరుద్ధరించేందుకు అధికారులు సన్నాహాలు చేస్తున్నారు. అప్పటివరకు ప్రయాణికులు ఎయిర్లైన్ అధికారిక వెబ్సైట్లు లేదా హెల్ప్లైన్ల ద్వారా తాజా సమాచారం తెలుసుకోవాలని సూచించారు.
Also read: