ఐదేళ్ల పసిపాపపై అత్యాచారం చేసి హత్య చేసిన ఓ క్రూర నేరస్థుడికి సంబంధించిన కేసులో హర్యానా హైకోర్టు (High Court) వెలువరించిన తీర్పు దేశవ్యాప్తంగా తీవ్ర చర్చకు దారి తీసింది. ఈ కేసులో నిందితుడికి విధించిన మరణశిక్షను యావజ్జీవ కఠిన కారాగార శిక్షగా మారుస్తూనే, అతడి నేరాన్ని కప్పిపుచ్చేందుకు ప్రయత్నించిన తల్లిని కోర్టు నిర్దోషిగా ప్రకటించింది. ఈ సందర్భంగా ధర్మాసనం చేసిన వ్యాఖ్యలు సామాజిక, న్యాయ వర్గాల్లో విస్తృత చర్చకు కారణమయ్యాయి.
“నిందితుడు సమాజానికి విలన్ కావొచ్చు.. కానీ ఆ తల్లికి మాత్రం ఎప్పటికీ రాజాబేటానే” అని కోర్టు వ్యాఖ్యానించడం ఈ తీర్పుకు మరింత ప్రాధాన్యం తీసుకొచ్చింది. (High Court) ఈ కేసు వివరాల్లోకి వెళితే, ఓ ఐదేళ్ల పసిబాలికపై అత్యాచారం చేసి, అనంతరం ఆమెను హత్య చేసిన ఘోర నేరంలో నిందితుడిగా తేలిన వ్యక్తికి కిందిస్థాయి కోర్టు గతంలో మరణశిక్ష విధించింది. ఈ తీర్పును సవాలు చేస్తూ నిందితుడు హర్యానా హైకోర్టును ఆశ్రయించాడు. ఈ పిటిషన్పై విచారణ చేపట్టిన జస్టిస్ అనూప్ చిత్కర, జస్టిస్ సుఖ్విందర్ కౌర్లతో కూడిన ధర్మాసనం కీలక తీర్పును వెలువరించింది.
నిందితుడి నేరం అత్యంత దారుణమైనదేనని, సమాజాన్ని కలచివేసే స్థాయిలో ఉందని కోర్టు స్పష్టం చేసింది. అయితే చట్టపరంగా ఉన్న వెసులుబాట్లు, శిక్ష నిర్ణయంలో అనుసరించాల్సిన ప్రమాణాలను పరిగణనలోకి తీసుకుని, మరణశిక్షకు బదులుగా యావజ్జీవ కఠిన కారాగార శిక్ష విధించడం సముచితమని ధర్మాసనం అభిప్రాయపడింది. నేర తీవ్రతను తగ్గించకుండా, కానీ “రేర్ ఆఫ్ ది రేర్” కేటగిరీకి సంబంధించిన అంశాలను సమగ్రంగా పరిశీలించిన తర్వాతే ఈ నిర్ణయం తీసుకున్నట్లు కోర్టు వెల్లడించింది.
ఈ కేసులో మరో కీలక అంశం నిందితుడి తల్లి పాత్ర. తన కుమారుడు చేసిన ఘోర నేరాన్ని దాచిపెట్టేందుకు, అతడిని కాపాడేందుకు ప్రయత్నించిందన్న ఆరోపణలపై ఆమెపై కూడా కేసు నమోదైంది. అయితే ఈ అంశాన్ని లోతుగా పరిశీలించిన హైకోర్టు, మాతృత్వంలోని సహజమైన మమకారాన్ని నేరంగా పరిగణించలేమని స్పష్టం చేసింది. కన్నబిడ్డ ఎంతటి ఘోర నేరానికి పాల్పడినా, అతడిని రక్షించుకోవాలనే తల్లి తాపత్రయం సహజమని, అది చట్టపరంగా నేరంగా నిరూపించడానికి సరిపోదని కోర్టు అభిప్రాయపడింది.
ఈ సందర్భంగా ధర్మాసనం చేసిన వ్యాఖ్యలు ప్రస్తుతం సామాజిక మాధ్యమాల్లో వైరల్గా మారాయి.
“తల్లి తన బిడ్డను రక్షించాలనుకోవడం మానవ సహజ లక్షణం. నిందితుడు సమాజానికి ఎంత పెద్ద నేరస్తుడైనా, ఆ తల్లికి మాత్రం అతడు రాజాబేటానే” అని కోర్టు వ్యాఖ్యానించింది. ఈ మాటలు మాతృత్వంలోని అంతులేని ప్రేమను ప్రతిబింబిస్తున్నాయని కొందరు ప్రశంసిస్తే, మరోవైపు ఇలాంటి వ్యాఖ్యలు తప్పు సంకేతాలను పంపుతాయన్న వాదన కూడా వినిపిస్తోంది.ఈ తీర్పు వెలువడిన తర్వాత న్యాయ నిపుణులు, సామాజిక కార్యకర్తలు, మహిళా సంఘాలు భిన్న అభిప్రాయాలను వ్యక్తం చేస్తున్నాయి. ఒకవర్గం మాత్రం, పిల్లలపై జరిగే ఘోర నేరాలకు మరణశిక్షే సరైన పరిష్కారమని వాదిస్తోంది. మరోవైపు, చట్టం భావోద్వేగాలకు లోబడకుండా న్యాయ సూత్రాల ఆధారంగా పనిచేయాలని, ఈ తీర్పు అదే దిశలో ఉందని కొందరు అభిప్రాయపడుతున్నారు.
Also read: