డెస్క్ జర్నలిస్టుల (DeskJournalists) హక్కుల కోసం తెలంగాణ వ్యాప్తంగా ఉద్యమ స్వరం వినిపించింది. డెస్క్ జర్నలిస్టులకు అక్రిడిటేషన్ కార్డులు జారీ చేయాలని, అలాగే జీవో నంబర్ 252ను తక్షణమే సవరించాలని డిమాండ్ చేస్తూ (DeskJournalists) డెస్క్ జర్నలిస్ట్స్ ఫెడరేషన్ ఆఫ్ తెలంగాణ (DJFT) పిలుపుతో రాష్ట్రవ్యాప్తంగా జిల్లా కలెక్టరేట్ల ముందు డెస్క్ జర్నలిస్టులు ధర్నాలకు దిగారు. ఉదయం నుంచే కలెక్టరేట్ల వద్ద పెద్ద సంఖ్యలో జర్నలిస్టులు చేరుకుని నినాదాలు చేస్తూ తమ ఆవేదనను ప్రభుత్వానికి తెలియజేశారు.
ఈ సందర్భంగా డీజేఎఫ్టీ నాయకులు మాట్లాడుతూ.. డెస్క్ జర్నలిస్టులు ఆరోగ్యాన్ని పణంగా పెట్టి పనిచేస్తున్నారని, వార్తల సేకరణ నుంచి ఎడిటింగ్, ప్రచురణ వరకు ప్రతి దశలో కీలక పాత్ర పోషిస్తున్నారని అన్నారు. అలాంటి వారిని అక్రిడిటేషన్ నుంచి దూరం పెట్టడం అంటే వారి హక్కులను లాక్కోవడమేనని తీవ్రంగా విమర్శించారు. ఎంతో కాలంగా పోరాడి సాధించుకున్న గుర్తింపును జీవో పేరుతో కుంగదీసే ప్రయత్నం జరుగుతోందని ఆరోపించారు.
రిపోర్టర్లు, డెస్క్ జర్నలిస్టులు కలిసే జర్నలిజం పరిపూర్ణమవుతుందని డీజేఎఫ్టీ నాయకులు స్పష్టం చేశారు. ఇన్పుట్ లేకుండా అవుట్పుట్ ఉండదని, అవుట్పుట్ లేకుండా ఇన్పుట్కు విలువ ఉండదని పేర్కొన్నారు. మీడియా వ్యవస్థలో ఎవరు ఎక్కువ, ఎవరు తక్కువ అన్న భావనను వెంటనే విడిచిపెట్టాలని ప్రభుత్వాన్ని కోరారు. డెస్క్ జర్నలిస్టులకు వేరే కార్డులు అంటూ వారిని సెకండ్ గ్రేడ్ సిటిజన్లుగా మార్చే ప్రయత్నం జరుగుతోందని ఆవేదన వ్యక్తం చేశారు.
మీడియా కార్డుల పేరిట వర్కింగ్ జర్నలిస్టులను విభజించడం వెనుక కుట్ర ఉందన్న అనుమానాలు వ్యక్తమవుతున్నాయని నాయకులు తెలిపారు. బస్ పాస్ సదుపాయం, ఇండ్ల స్థలాల కేటాయింపులు వంటి సంక్షేమ పథకాల నుంచి డెస్క్ జర్నలిస్టులను దూరం పెట్టేందుకే ఈ విధమైన పాలసీ తీసుకొచ్చారని ఆరోపించారు. జర్నలిస్టుల మధ్య చిచ్చు పెట్టే ప్రయత్నాలను ప్రభుత్వం విరమించుకోవాలని డిమాండ్ చేశారు.
ఈ అంశంపై ప్రభుత్వం వెంటనే స్పందించి, గతంలో ఉన్న విధానాన్ని కొనసాగిస్తూ వర్కింగ్ జర్నలిస్టులందరికీ—రిపోర్టర్లు, డెస్క్ జర్నలిస్టులు అనే తేడా లేకుండా—అక్రిడిటేషన్ కార్డులు జారీ చేయాలని డీజేఎఫ్టీ విజ్ఞప్తి చేసింది. డిమాండ్లను ప్రభుత్వం పట్టించుకోకపోతే ఉద్యమాన్ని మరింత ఉధృతం చేస్తామని హెచ్చరించారు. ఈ ధర్నాలు జర్నలిస్టుల ఐక్యతకు నిదర్శనంగా నిలిచాయని పలువురు వ్యాఖ్యానించారు.
Also read: