మధ్యప్రదేశ్ రాష్ట్రంలోని (Indore) ఇండోర్ నగరంలో కలుషిత నీరు తీవ్ర విషాదాన్ని మిగిల్చింది. తాగునీటి సరఫరాలో కలుషితం ఏర్పడటంతో ఇప్పటివరకు మృతుల సంఖ్య 28కి చేరింది. ఈ ఘటన రాష్ట్రవ్యాప్తంగా కలకలం రేపుతోంది. ముఖ్యంగా (Indore) ఇండోర్లోని భగీరథ్పుర్ ప్రాంతంలో పరిస్థితి అత్యంత ఆందోళనకరంగా మారింది. అక్కడ కలుషిత నీరు తాగిన పలువురు తీవ్ర అస్వస్థతకు గురై ఆసుపత్రుల్లో చికిత్స పొందుతున్నారు.భగీరథ్పుర్ ప్రాంతంలో ప్రస్తుతం 10 మంది ఆసుపత్రిలో చికిత్స పొందుతున్నారని అధికారులు వెల్లడించారు. వీరిలో ఇద్దరి పరిస్థితి విషమంగా ఉందని వైద్యులు తెలిపారు. బాధితుల్లో చిన్నారులు, వృద్ధులు కూడా ఉండటంతో కుటుంబ సభ్యులు తీవ్ర భయాందోళనకు గురవుతున్నారు. వైద్య సిబ్బంది నిరంతరం పర్యవేక్షణ చేస్తూ అత్యవసర చికిత్స అందిస్తున్నారు.
ఇదిలా ఉండగా, ఇండోర్ సమీపంలోని మోవ్ ప్రాంతంలో కూడా కలుషిత నీటి ప్రభావం కనిపించింది. అక్కడ దాదాపు 30 మంది ఒక్కసారిగా అస్వస్థతకు గురయ్యారు. వాంతులు, విరేచనాలు, జ్వరం వంటి లక్షణాలతో బాధితులు ఆసుపత్రులకు పరుగులు తీశారు. ఈ ఘటనతో స్థానికులు తాగునీటి నాణ్యతపై తీవ్ర ఆందోళన వ్యక్తం చేస్తున్నారు.ప్రభుత్వం ఈ ఘటనపై స్పందించింది. ఇప్పటికే 21 మంది మృతుల కుటుంబాలకు ఒక్కొక్కరికి రూ.2 లక్షల చొప్పున పరిహారం చెల్లించినట్లు అధికారులు తెలిపారు. మిగతా మృతుల కుటుంబాలకు కూడా త్వరలోనే సహాయం అందిస్తామని హామీ ఇచ్చారు. అలాగే బాధితులకు అన్ని రకాల వైద్య సేవలు అందుబాటులో ఉంచామని ఇండోర్ కలెక్టర్ శివమ్ వర్మ స్పష్టం చేశారు.
కలుషిత నీరు ఎలా సరఫరా అయిందనే అంశంపై అధికారులు విచారణ ప్రారంభించారు. తాగునీటి పైపులైన్లలో లీకేజీ, మురుగు నీరు కలవడం వల్లే ఈ పరిస్థితి తలెత్తినట్లు ప్రాథమిక అంచనాలు వెలువడుతున్నాయి. నీటి సరఫరా వ్యవస్థను పూర్తిగా తనిఖీ చేసి, సమస్యను పరిష్కరించేందుకు చర్యలు తీసుకుంటున్నట్లు అధికారులు తెలిపారు. అవసరమైన చోట్ల తాత్కాలికంగా వాటర్ ట్యాంకర్ల ద్వారా శుద్ధమైన నీటిని సరఫరా చేస్తున్నారు.ఈ ఘటన నేపథ్యంలో ప్రజలకు అధికారులు పలు సూచనలు చేశారు. నీటిని మరిగించి తాగాలని, బయట ఆహారం తీసుకోవద్దని, ఏవైనా లక్షణాలు కనిపిస్తే వెంటనే ఆసుపత్రికి వెళ్లాలని సూచించారు. వైద్య శిబిరాలు ఏర్పాటు చేసి, అవసరమైన మందులు పంపిణీ చేస్తున్నారు. నగరంలోని ఆసుపత్రుల్లో ప్రత్యేక వార్డులను సిద్ధం చేసి, అదనపు వైద్య సిబ్బందిని నియమించారు.
Also read: