మేడారం సమ్మక్క–సారలమ్మ మహాజాతర (Medaram Jatara) సందర్భంగా భక్తుల ఆధ్యాత్మిక ఉత్సాహం పరాకాష్టకు చేరుకుంది. జాతర ప్రారంభంతోనే మేడారం అటవీ ప్రాంతం భక్తుల కోలాహలంతో, పూజల శబ్దాలతో, శివశత్తుల పూనకాలతో మార్మోగుతోంది. ముఖ్యంగా జంపన్న వాగు వద్ద భక్తుల పుణ్యస్నానాలు అత్యంత ఘనంగా కొనసాగుతున్నాయి. తెల్లవారుజాము నుంచే వేలాదిగా భక్తులు జంపన్న వాగు వద్దకు చేరుకుని పవిత్ర జలాల్లో స్నానాలు ఆచరించి తమ మొక్కులు చెల్లించుకుంటున్నారు. (Medaram Jatara) జంపన్న వాగులో స్నానం చేస్తే పాపాలు తొలగి సంతానం, ఆరోగ్యం, ఐశ్వర్యం కలుగుతాయన్న విశ్వాసంతో కుటుంబ సమేతంగా భక్తులు తరలివస్తున్నారు.
జంపన్న వాగు పరిసరాల్లో శివశత్తుల పూనకాలు ప్రత్యేక ఆకర్షణగా నిలుస్తున్నాయి. కో అంటే కో అంటూ అరుస్తూ, అమ్మవార్ల నామస్మరణ చేస్తూ, శివశత్తులు పూనకాల్లో ఊగిపోతూ భక్తులను ఆశీర్వదిస్తున్నారు. వారి నినాదాలు, డోలు, వాయిద్యాల శబ్దాలతో మేడారం పరిసరాలు మార్మోగుతున్నాయి. కొందరు శివశత్తులు అమ్మవారి గద్దెల దిశగా పాదయాత్రగా సాగుతూ భక్తులకు దీవెనలు అందిస్తున్నారు. ఈ దృశ్యాలు మేడారం జాతర ప్రత్యేకతను మరోసారి చాటుతున్నాయి.
భక్తుల రద్దీ ఎక్కువగా ఉండటంతో కొంతమంది కుటుంబ సభ్యులు ఒకరినొకరు తప్పిపోయే ఘటనలు చోటుచేసుకుంటున్నాయి. దీనిని దృష్టిలో ఉంచుకుని అధికారులు ప్రత్యేకంగా మిస్సింగ్ కేంద్రాలను ఏర్పాటు చేశారు. ఈ కేంద్రాల వద్ద మైక్ అనౌన్స్మెంట్ల ద్వారా తప్పిపోయిన వారి వివరాలను ప్రకటిస్తూ, కుటుంబాలను మళ్లీ కలిపే ప్రయత్నాలు చేస్తున్నారు. చిన్నపిల్లలు, వృద్ధులు తప్పిపోయిన సందర్భాల్లో పోలీస్ సిబ్బంది, వాలంటీర్లు చురుకుగా స్పందిస్తూ వారికి భరోసా కల్పిస్తున్నారు. మిస్సింగ్ కేంద్రాల ద్వారా అనేక కుటుంబాలు తిరిగి కలుసుకోవడం భక్తులకు ఊరటనిచ్చే అంశంగా మారింది.
మేడారం గద్దెల వద్దకు చేరుకునేందుకు ఏర్పాటు చేసిన క్యూ లైన్లలో భక్తులు ఓపికతో క్రమశిక్షణ పాటిస్తున్నారు. అమ్మవార్లకు పసుపు, కుంకుమ, చీరె సారే, బెల్లం, కొబ్బరికాయలు, బంగారం సమర్పిస్తూ ప్రత్యేక పూజలు నిర్వహిస్తున్నారు. కొందరు భక్తులు తులాభారం, బంగారు మొక్కులు సమర్పిస్తూ తమ భక్తిని చాటుకుంటున్నారు. మేడారం చుట్టుపక్కల ప్రాంతాల్లో భక్తులు వంటావార్పులు చేసుకుని విందు భోజనాలు ఏర్పాటు చేసుకోవడంతో పండుగ వాతావరణం నెలకొంది.
భారీ భక్తుల రద్దీ నేపథ్యంలో పోలీసులు గద్దెలు, జంపన్న వాగు, రహదారులు, సంత ప్రాంగణాల్లో కట్టుదిట్టమైన బందోబస్తు ఏర్పాటు చేశారు. వైద్య శిబిరాలు, తాగునీరు, పారిశుధ్య ఏర్పాట్లపై అధికారులు ప్రత్యేక దృష్టి సారించారు. భక్తుల భద్రత, సౌకర్యమే ప్రధాన లక్ష్యంగా ప్రభుత్వ యంత్రాంగం సమన్వయంతో పనిచేస్తోంది. దక్షిణ భారత కుంభమేళాగా పేరుగాంచిన మేడారం జాతర భక్తి, సంప్రదాయం, ఆధ్యాత్మికతతో మరోసారి అద్భుతంగా కొనసాగుతోంది.
Also read: