కర్ణాటకకు గర్వకారణంగా నిలిచిన, శతాబ్దకాల చరిత్ర ఉన్న (Mysore Sandal) మైసూరు సాండల్ సోప్ మరోసారి కొత్త రూపంలో మార్కెట్లోకి వచ్చింది. ప్రభుత్వ రంగ సంస్థ అయిన (Mysore Sandal)కర్ణాటక సోప్స్ అండ్ డిటర్జెంట్స్ లిమిటెడ్ (KSDL) ఈ ప్రతిష్టాత్మక బ్రాండ్ను ఆధునిక మార్కెట్ అవసరాలకు అనుగుణంగా రీ లాంచ్ చేస్తూ, డిజిటల్ యుగానికి తగ్గట్టుగా రీబ్రాండింగ్ చేపట్టింది. అయితే ఈ రీ లాంచ్ ఆనందం కంటే ఎక్కువగా ఇప్పుడు రాజకీయ, సాంస్కృతిక వివాదాలే చర్చనీయాంశంగా మారాయి. మైసూరు సాండల్ సోప్ బ్రాండ్ అంబాసిడర్గా ముంబైలో జన్మించిన ప్రముఖ సినీ నటి తమన్నా భాటియాను నియమించడమే ఇందుకు కారణం.
భారీ, మధ్యతరహా పరిశ్రమల మంత్రి ఎంబీ పాటిల్ ఈ రోజు అధికారికంగా మైసూరు సాండల్ సోప్ రీ లాంచ్ను ప్రకటించారు. ఈ సందర్భంగా మాట్లాడుతూ, 2030 నాటికి కేఎస్డీఎల్ వార్షిక టర్నోవర్ను రూ.5,000 కోట్లకు పెంచడమే ప్రభుత్వ లక్ష్యమని స్పష్టం చేశారు. ఇందుకోసం డిజిటల్ మార్కెటింగ్పై ప్రత్యేక దృష్టి పెట్టడం, దేశీయంగానే కాకుండా అంతర్జాతీయ మార్కెట్లలో ఎగుమతులను విస్తరించడం, కొత్త ఉత్పత్తులు, ఆవిష్కరణల ద్వారా యువతను ఆకర్షించడం వంటి వ్యూహాలను అమలు చేయనున్నట్లు తెలిపారు. మైసూరు సాండల్ కేవలం ఒక సోప్ కాదు, అది కన్నడ నేల సువాసనను ప్రపంచానికి చాటిచెప్పే బ్రాండ్ అని మంత్రి వ్యాఖ్యానించారు.
అయితే ఈ రీ లాంచ్ ప్రకటనతో పాటే తీవ్ర విమర్శలు మొదలయ్యాయి. ముఖ్యంగా బీజేపీ ఎంపీ కే సుధాకర్ ఈ నిర్ణయంపై ఘాటుగా స్పందించారు. కర్ణాటకలో ఎన్నో ప్రతిభావంతమైన కన్నడ నటులు, నటీమణులు ఉన్నారని, అలాంటి వారిని పక్కనపెట్టి ఇతర రాష్ట్రానికి చెందిన నటిని బ్రాండ్ అంబాసిడర్గా ఎంపిక చేయడం కాంగ్రెస్ పార్టీ యాంటీ కన్నడ ఆలోచనకు నిదర్శనమని ఆయన ఆరోపించారు. ఇది కన్నడ నాడు ప్రతిభకు అవమానం మాత్రమే కాకుండా, స్థానిక సంస్కృతిని నిర్లక్ష్యం చేసినట్లేనని విమర్శించారు.
ఈ వివాదం కొత్తది కాదు. గతేడాది మే నెలలోనే తమన్నా భాటియాను సుమారు రూ.6.2 కోట్ల భారీ పారితోషికంతో మైసూరు సాండల్ బ్రాండ్ అంబాసిడర్గా నియమించారు. అప్పటినుంచే ప్రో కన్నడ సంఘాలు, విపక్ష పార్టీలు ఈ నిర్ణయానికి వ్యతిరేకంగా నిరసనలు తెలుపుతున్నాయి. “కన్నడ గర్వానికి చిహ్నమైన బ్రాండ్కు కన్నడ ముఖమే ఉండాలి” అనే నినాదంతో పలు సంఘాలు రోడ్డెక్కాయి. కొందరు తమన్నాకు వ్యక్తిగతంగా వ్యతిరేకం కాదని, కానీ స్థానిక కళాకారులకు ప్రాధాన్యం ఇవ్వాల్సిందని స్పష్టం చేస్తున్నారు.
ఇక మరోవైపు, కేఎస్డీఎల్ అధికారులు మాత్రం తమ నిర్ణయాన్ని సమర్థించుకుంటున్నారు. దేశవ్యాప్తంగా, అంతర్జాతీయ స్థాయిలో బ్రాండ్ను విస్తరించాలంటే పాన్-ఇండియా ఇమేజ్ ఉన్న సెలబ్రిటీ అవసరమని, తమన్నాకు దక్షిణ భారతంతో పాటు ఉత్తర భారతంలోనూ విస్తృతమైన అభిమాన గణం ఉందని వారు చెబుతున్నారు. మార్కెటింగ్ పరంగా తీసుకున్న వ్యూహాత్మక నిర్ణయమే తప్ప, దీనికి ప్రాంతీయ భావాలతో సంబంధం లేదని స్పష్టం చేస్తున్నారు.
ఈ మొత్తం వ్యవహారం ఇప్పుడు కేవలం ఒక సోప్ బ్రాండ్ రీ లాంచ్కు మాత్రమే పరిమితం కాకుండా, కన్నడ గుర్తింపు, స్థానిక ప్రతిభకు ప్రాధాన్యం, గ్లోబల్ మార్కెటింగ్ అవసరాలు వంటి అంశాలపై పెద్ద చర్చకు దారి తీసింది. మైసూరు సాండల్ రీ లాంచ్ విజయవంతమవుతుందా..? లేక ఈ వివాదం బ్రాండ్ ఇమేజ్పై ప్రభావం చూపుతుందా..? అన్నది రాబోయే రోజుల్లో తేలనుంది.
Also read: