అమెరికా అధ్యక్షుడు డొనాల్డ్ ట్రంప్ తీసుకున్న ఎగ్జిక్యూటివ్ డెసిషన్ (Indian) భారతీయ విద్యార్థులను కలవర పెడుతోంది. ఉన్నత విద్యకోసం అగ్రరాజ్యానికి వెళ్లిన స్టూడెంట్స్ తాము ఇప్పటి వరకు చేస్తున్న పార్ట్ టైం జాబ్స్ వదులు కుంటున్నారు. అక్రమంగా ఉద్యోగాలు చేసినట్టు ప్రభుత్వం తేల్చితే తమ డిగ్రీ క్యాన్సిల్ కావడంతోపాటు ఆ దేశం నుంచి తిప్పి పంపిస్తారనే భయం వారిని వెంటాడుతోంది. దీంతో వీసా నిబంధనలకు అనుగుణంగా కేవలం చదువులకే పరిమితమవుతున్నారు. పార్ట్ టైం జాబ్స్ కోల్పోవడంతో ఆర్థిక ఇబ్బందుల పాలవుతున్నారు. ఎఫ్–1 వీసాల ప్రకారం (Indian) భారతీయ విద్యార్థులు వారానికి 20 గంటలు మాత్రమే చదువుకొనే క్యాంపస్ పరిధిలో పనిచేసేందుకు అనుమతి ఉంటుంది. 6.50 లక్షల మంది భారతీయ విద్యార్థులు ఎఫ్–1 వీసాలపై అమెరికాలో స్టడీస్ చేస్తున్నారు.
సగం మంది భారతీయులే!
2023లో అమెరికా 3 లక్షల 30 వేల మంది ఎఫ్–1 వీసాలు జారీ చేసింది. అందులో లక్షా 80 వేల మంది స్టూడెంట్స్ ఇండియా నుంచే వెళ్లారు. తెలంగాణ, ఆంధ్రప్రదేశ్ రాష్ట్రాల నుంచే 30 వేల మంది వరకు వెళ్లి ఉండొచ్చు అని అంచనా ఉంది. 2024 లోనూ అదే స్థాయిలో వెళ్లి ఉంటారనే అంచనా ఉంది.
ఖర్చులకు చాలవు
ఎఫ్–1 వీసా రూల్స్ ప్రకారం వారానికి 20 గంటలే పనిచేయాలి. అలా చేయడం ద్వారా నెలకు లక్ష రూపాయల ఆదాయం వస్తుంది. ఆ డబ్బులు చదువులకు, ట్రాన్స్ పోర్ట్ ఖర్చులకు సరిపోతాయి. కానీ తినడానికి తిండి, ఉండటానికి ఇల్లు, కట్టుకునేందుకు బట్టలకు డబ్బులు కావాలి. దీంతో పైసలెట్లా అనే టెన్షన్ మనోళ్లను వెంటాడుతోంది.