క్రిస్మస్ పండుగ ఆనందాన్ని ఆస్వాదించాల్సిన వేళ (Mexico) మెక్సికో దేశం విషాదంలో మునిగిపోయింది. పండుగ కోసం స్వగ్రామాలకు వెళ్తున్న ప్రయాణికులతో నిండిన బస్సు ఒక్కసారిగా అదుపు తప్పి లోయలోకి దూసుకెళ్లడంతో 10 మంది ప్రాణాలు కోల్పోయారు. ఈ దుర్ఘటనలో ఓ చిన్నారి కూడా మృతి చెందడం హృదయవిదారకంగా మారింది. మరో 32 మంది తీవ్రంగా గాయపడటంతో ఆ ప్రాంతమంతా శోకసంద్రంగా మారింది.ఈ ఘోర ప్రమాదం (Mexico) మెక్సికోలోని వెరక్రూజ్ రాష్ట్రం, జొంటోకొమట్లాన్ పట్టణం సమీపంలో చోటుచేసుకుంది. క్రిస్మస్ వేడుకల్లో పాల్గొనేందుకు, కుటుంబ సభ్యులతో కలిసి పండుగ జరుపుకోవాలనే ఆశతో ప్రయాణిస్తున్న వారు ఈ ప్రమాదానికి గురయ్యారు. బస్సు మలుపులతో కూడిన ఘాట్ రోడ్డుపై ప్రయాణిస్తుండగా ఒక్కసారిగా డ్రైవర్ నియంత్రణ కోల్పోయినట్లు సమాచారం. దాంతో బస్సు సుమారు 600 అడుగులకుపైగా లోతున్న లోయలోకి బోల్తా పడింది.
ప్రమాద తీవ్రత అంతలా ఉండటంతో బస్సు పూర్తిగా ధ్వంసమైంది. ప్రయాణికులు లోయలో చెల్లాచెదురుగా పడిపోవడంతో సహాయక చర్యలు చేపట్టడం అధికారులకు తీవ్ర సవాలుగా మారింది. సమాచారం అందిన వెంటనే అగ్నిమాపక దళాలు, పోలీసులు, అత్యవసర సహాయక బృందాలు ఘటనాస్థలికి చేరుకున్నాయి. లోయలోకి దిగి గాయపడిన వారిని బయటకు తీసుకురావడానికి గంటల తరబడి శ్రమించారు. కొందరిని తాళ్ల సహాయంతో పైకి తీసుకురాగా, మరికొందరిని స్ట్రెచర్లపై తరలించారు.గాయపడిన వారిని సమీపంలోని ప్రభుత్వ, ప్రైవేట్ ఆసుపత్రులకు తరలించి చికిత్స అందిస్తున్నారు. పలువురి పరిస్థితి విషమంగా ఉండటంతో మృతుల సంఖ్య మరింత పెరిగే అవకాశం ఉందని వైద్యులు వెల్లడించారు. ప్రమాదంలో మృతి చెందిన వారి కుటుంబ సభ్యులు ఆసుపత్రుల వద్ద కన్నీటి పర్యంతమయ్యారు. క్రిస్మస్ పండుగ వేళ ఇలా విషాదం చోటుచేసుకోవడంతో దేశవ్యాప్తంగా దిగ్భ్రాంతి వ్యక్తమవుతోంది.
మెక్సికోలో లోయలు, కొండ ప్రాంతాలు, మలుపులతో కూడిన రహదారులు అధికంగా ఉండటంతో తరచూ ఇలాంటి ప్రమాదాలు జరుగుతున్నాయని నిపుణులు చెబుతున్నారు. ముఖ్యంగా పండుగ సమయాల్లో ప్రయాణికుల రద్దీ పెరగడం, అతి వేగం, డ్రైవర్ల అలసట, వాహనాల సాంకేతిక లోపాలు ఈ ప్రమాదాలకు ప్రధాన కారణాలుగా మారుతున్నాయి. అధికారులు పదేపదే హెచ్చరిస్తున్నప్పటికీ రోడ్డు భద్రతా నిబంధనలు పూర్తిగా అమలుకావడం లేదన్న విమర్శలు ఉన్నాయి.గత నెలల్లోనే మెక్సికోలోని పశ్చిమ రాష్ట్రమైన మిచోకాన్లో ఇలాంటి మరో ఘోర ప్రమాదం చోటుచేసుకుంది.
ఆ ఘటనలో కూడా లోయలోకి బస్సు పడటంతో 10 మంది మృతి చెందగా, 20 మంది గాయపడ్డారు. ఈ వరుస ప్రమాదాలు మెక్సికోలో రహదారి భద్రతపై తీవ్ర ఆందోళనలు కలిగిస్తున్నాయి.తాజా ప్రమాదంపై మెక్సికో ప్రభుత్వం దిగ్భ్రాంతి వ్యక్తం చేసింది. మృతుల కుటుంబాలకు సంతాపం తెలియజేస్తూ, గాయపడిన వారికి మెరుగైన వైద్యం అందించాలని అధికారులను ఆదేశించింది. అలాగే ప్రమాదానికి గల కారణాలపై సమగ్ర విచారణ చేపట్టాలని, రోడ్డు భద్రతను మరింత కఠినంగా అమలు చేయాలని నిర్ణయించింది.
Also read: