మధ్యప్రాచ్యంలో ఉద్రిక్తతలు మరింత తీవ్రమవుతున్న సమయంలో, ఇరాన్పై అమెరికా (US) చేపట్టిన మెరుపు దాడులపై కీలక వివరాలను అమెరికా విదేశాంగ మంత్రి Marco Rubio వెల్లడించారు. ఇజ్రాయెల్ త్వరలో దాడికి సిద్ధమవుతోందనే సమాచారంతో, అమెరికా తన సైనికుల ప్రాణాలను రక్షించేందుకు ముందస్తు చర్యలు తీసుకున్నట్లు ఆయన స్పష్టం చేశారు.సోమవారం మీడియాతో మాట్లాడిన రూబియో, ఈ నిర్ణయం వెనుక ఉన్న వ్యూహాత్మక ఆలోచనలను వివరించారు. ఆయన ప్రకారం, ఇజ్రాయెల్ ఇరాన్పై దాడి చేయబోతుందనే గూఢచారి సమాచారం (US) అమెరికా వద్ద ముందుగానే ఉందన్నారు. ఆ దాడి అనంతరం గల్ఫ్ ప్రాంతంలో ఉన్న అమెరికా సైనిక స్థావరాలపై ఇరాన్ ప్రతీకార చర్యలకు దిగే అవకాశముందని అంచనా వేసినట్లు తెలిపారు.
ఇలాంటి పరిస్థితిలో కేవలం రక్షణాత్మకంగా ఉండటం వల్ల అమెరికా భారీ మూల్యాన్ని చెల్లించుకోవాల్సి వచ్చేదని రూబియో హెచ్చరించారు. అందువల్లే ముందస్తుగా ఇరాన్ క్షిపణి వ్యవస్థలను లక్ష్యంగా చేసుకుని దాడులు నిర్వహించామని చెప్పారు. శత్రువు దాడి చేసే వరకు వేచి చూడడం కంటే, ముందుగానే అప్రమత్తమై ప్రతిస్పందించడం ఉత్తమ వ్యూహమని ఆయన వ్యాఖ్యానించారు.
ఈ నిర్ణయానికి అమెరికా అధ్యక్షుడు Donald Trump ఆమోదం తెలిపారని, దేశ భద్రత దృష్ట్యా తీసుకున్న అత్యంత తెలివైన నిర్ణయమని రూబియో పేర్కొన్నారు. గల్ఫ్ ప్రాంతంలో అమెరికా బలగాల భద్రతకు ప్రాధాన్యం ఇవ్వడం తమ బాధ్యత అని ఆయన స్పష్టం చేశారు.
ఇటీవలి కాలంలో ఇరాన్-ఇజ్రాయెల్ మధ్య ఉద్రిక్తతలు పెరుగుతున్న నేపథ్యంలో, అమెరికా పాత్ర కీలకంగా మారింది. ఇరాన్ క్షిపణి సామర్థ్యాన్ని తగ్గించడమే లక్ష్యంగా ఈ దాడులు జరిగినట్లు విశ్లేషకులు అభిప్రాయపడుతున్నారు. అయితే ఈ పరిణామాలు మధ్యప్రాచ్యంలో పరిస్థితులను మరింత సంక్లిష్టం చేసే అవకాశముందని నిపుణులు హెచ్చరిస్తున్నారు.
ఇరాన్ వైపు నుంచి అధికారిక ప్రతిస్పందనపై ప్రపంచ దృష్టి నిలిచింది. ఇప్పటికే ప్రాంతీయ ఉద్రిక్తతలు తీవ్ర స్థాయికి చేరుకున్న నేపథ్యంలో, ఈ ముందస్తు దాడులు యుద్ధాన్ని మరింత విస్తరించే ప్రమాదం ఉందని అంతర్జాతీయ వర్గాలు భావిస్తున్నాయి.
Also read:
- Thailand: ఇద్దరు స్నేహితులను పెళ్లి చేసుకున్న మాజీ గాయని
- Chandra Grahan: పాక్షిక చంద్రగ్రహణం సంప్రదాయ సూచనలు