Adilabad: వరద నీటిలో మునిగిన పట్టణాలు

ఆదిలాబాద్ (Adilabad) జిల్లా గత ఐదు రోజులుగా కురుస్తున్న కుండపోత వర్షాలతో పూర్తిగా జలదిగ్బంధంలో చిక్కుకుంది. పట్టణాలు, కాలనీలు, రహదారులు అన్నీ నీటితో నిండిపోయి ప్రజలు తీవ్ర ఇబ్బందులు పడుతున్నారు. ముఖ్యంగా (Adilabad) పట్టణంలోని ప్రధాన రహదారులు కాలువల మాదిరిగా మారిపోవడంతో వాహనాలు, పాదచారులు తీవ్ర ఇబ్బందులు ఎదుర్కొంటున్నారు. రోడ్డా? వాగానా? అనే స్థాయిలో నీరు నిలిచిపోవడం వల్ల పరిస్థితి మరింత క్లిష్టమైంది.

ఉమ్మడి ఆదిలాబాద్ జిల్లాలోని ప్రధాన వాగులు, ప్రాజెక్టులు కూడా వరద నీటితో ఉప్పొంగుతున్నాయి. కుమ్రం భీం, సాత్నాల వాగు, కడెం, గడ్డెన్న వాగు, స్వర్ణ ప్రాజెక్టులకు భారీగా ఇన్‌ఫ్లో వస్తోంది. దీంతో అధికారులు దిగువ ప్రాంతాలకు నీటిని విడుదల చేస్తున్నారు. ఈ నేపథ్యంలో దిగువ ప్రాంతాల ప్రజలు అప్రమత్తంగా ఉండాలని అధికార యంత్రాంగం హెచ్చరిస్తోంది.

పట్టణంలోని ధోబీకాలనీ, హ్యాండ్ క్యాప్ కాలనీల్లో పరిస్థితి మరింత దయనీయంగా మారింది. భారీ వర్షం కారణంగా ఇళ్లలోకి నీరు చొరబడింది. దీంతో అక్కడ నివాసం ఉంటున్న ప్రజల నిత్యావసర వస్తువులు తడిచిపోయాయి. చాలా మంది తమ ఇళ్లను వదిలి బంధువుల ఇళ్లకు, సురక్షిత ప్రదేశాలకు తరలిపోతున్నారు.

భీంపూర్ మండలంలో నిప్పాని వాగు పొంగి పొర్లుతోంది. దీంతో రాకపోకలు పూర్తిగా అడ్డంకులు ఎదుర్కొంటున్నాయి. విద్యార్థులు పాఠశాలలకు వెళ్లేందుకు బయలుదేరినా వరద ప్రవాహం కారణంగా తిరిగి ఇంటికే చేరాల్సి వచ్చింది. ఇది విద్యా కార్యకలాపాలపై కూడా తీవ్ర ప్రభావం చూపుతోంది.

ఉట్నూర్ మండల కేంద్రంలో కురుస్తున్న వర్షానికి శంభు మత్తడి గూడ ప్రాజెక్టు ఉప్పొంగి ప్రవహిస్తోంది. వరద ముప్పు కారణంగా గ్రామస్తులు ఆందోళన చెందుతున్నారు. అలాగే ఆదిలాబాద్ జిల్లా బోరజ్ మండలంలోని తర్నామ్ వాగు పొంగి ప్రవహిస్తుండటంతో రాకపోకలకు తీవ్ర అంతరాయం ఏర్పడింది. వాహనాలు నిలిచిపోయాయి. పల్లెల నుంచి పట్టణాలకు వెళ్లే రహదారులు పూర్తిగా మూసుకుపోయాయి.

ప్రజలు కేవలం నీటి ముప్పు వల్లనే కాకుండా, విద్యుత్, తాగునీటి సరఫరా వంటి సౌకర్యాలు దెబ్బతినడంతో మరింత ఇబ్బందులు పడుతున్నారు. అధికారులు సహాయక చర్యలు చేపట్టినప్పటికీ నిరంతర వర్షపాతం కారణంగా పరిస్థితి అదుపులోకి రావడం లేదు. జిల్లా వ్యాప్తంగా వర్షం ప్రభావం రోజురోజుకు పెరుగుతుండడంతో పరిస్థితులు మరింత తీవ్రతరం అయ్యే అవకాశముందని అంచనా వేస్తున్నారు.

వర్షాల దాటికి ప్రజలు ఇళ్లలోనే బందీగా మారిపోగా, పల్లెల్లో రైతులు పంటల నష్టంపై ఆందోళన వ్యక్తం చేస్తున్నారు. పత్తి, మక్క, ఇతర పంటలు వరద నీటిలో మునిగిపోవడంతో తీవ్ర ఆర్థిక నష్టాలు తప్పకపోవచ్చని వారు ఆవేదన చెందుతున్నారు.

అధికారులు ప్రజలను ఎప్పటికప్పుడు అప్రమత్తంగా ఉండాలని సూచిస్తున్నారు. అవసరమైతే సురక్షిత ప్రదేశాలకు తరలించేందుకు ప్రత్యేక బృందాలను సిద్ధం చేశారు.