పెళ్లి తర్వాత తొలి సంక్రాంతి పండుగను జరుపుకుంటూ నటి సమంత రూత్ ప్రభు అభిమానులతో మధురమైన క్షణాలను పంచుకున్నారు. గతేడాది డిసెంబర్ 1, 2025న దర్శకుడు రాజ్ నిడిమోరుతో వివాహ బంధంలోకి అడుగుపెట్టిన సమంతకు (Samantha) ఇది తొలి సంక్రాంతి కావడం విశేషంగా మారింది. ఈ పండుగను ప్రత్యేకంగా గుర్తుగా నిలుపుకుంటూ సమంత తన ఆనందాన్ని సోషల్ మీడియాలో వ్యక్తం చేశారు.
జనవరి 15న సమంత(Samantha) తన ఇన్స్టాగ్రామ్ ఖాతాలో భర్త రాజ్ నిడిమోరుతో కలిసి దిగిన ఓ ఫొటోను షేర్ చేశారు. ఆ ఫొటోకు ‘సంక్రాంతి వైబ్స్’ అనే క్యాప్షన్ ఇచ్చారు. కారులో కూర్చుని ఇద్దరూ రెడ్ రంగు సంప్రదాయ వస్త్రాల్లో ట్విన్నింగ్ అవుతూ కనిపించారు. సమంత గూఫీ ఎక్స్ప్రెషన్తో సెల్ఫీకి పోజ్ ఇవ్వగా, ఆ ఫొటో అభిమానులను బాగా ఆకట్టుకుంది. ఈ ఫొటో సోషల్ మీడియాలో వైరల్ అవుతూ వేల సంఖ్యలో లైక్స్, కామెంట్లు పొందుతోంది.
సమంత – రాజ్ నిడిమోరు వివాహం డిసెంబర్ 1 తెల్లవారుజామున కోయంబత్తూరులోని ఈశా యోగా సెంటర్లో ఉన్న లింగ భైరవి దేవాలయంలో జరిగింది. కుటుంబ సభ్యులు, అత్యంత సన్నిహితుల సమక్షంలో ఈ పెళ్లి వేడుక ఘనంగా నిర్వహించారు. సంప్రదాయాలకు ప్రాధాన్యత ఇస్తూ, యోగ సంప్రదాయ పద్ధతిలో ఈ వివాహాన్ని జరిపారు.
ఈ వివాహం ‘భూత శుద్ధి వివాహం’ అనే ప్రత్యేక ప్రక్రియ ద్వారా జరగడం మరో విశేషం. ఆలోచనలు, భావోద్వేగాలు, భౌతికతకు అతీతంగా దంపతుల మధ్య లోతైన బంధాన్ని ఏర్పరచడం ఈ వివాహ విధానంలోని ముఖ్య ఉద్దేశం. వధూవరుల దేహాల్లోని పంచభూతాలను శుద్ధి చేసి, శారీరకంగా మరియు మానసికంగా సమతుల్యత కల్పించే విధంగా ఈ క్రతువు రూపొందించబడింది.
లింగ భైరవి ఆలయాల్లో, ప్రత్యేకంగా ఎంపిక చేసిన పవిత్ర ప్రదేశాల్లో మాత్రమే ఈ వివాహ క్రతువును నిర్వహిస్తారు. ఆధ్యాత్మికతతో కూడిన ఈ పెళ్లి వేడుక సమంత అభిమానుల్లో ఆసక్తిని కలిగించింది. సంప్రదాయ విలువలను గౌరవిస్తూ జీవితంలో కొత్త అధ్యాయాన్ని ప్రారంభించిన సమంత నిర్ణయానికి అభిమానులు ప్రశంసలు కురిపిస్తున్నారు.
ఇప్పుడు తొలి సంక్రాంతిని భర్తతో కలిసి ఆనందంగా జరుపుకుంటూ, వ్యక్తిగత జీవితంలోనూ సమంత సంతోషంగా ముందుకు సాగుతున్నట్లు ఈ ఫొటోలు స్పష్టం చేస్తున్నాయి. వృత్తిపరమైన విజయాలతో పాటు, వ్యక్తిగత జీవితంలోనూ కొత్త ఆనందాలను ఆస్వాదిస్తున్న సమంతకు అభిమానులు శుభాకాంక్షలు తెలుపుతున్నారు.
Also read :
Medaram: మేడారం రూట్ లో ట్రాఫిక్ జాం
Sankranthi: పందులు, పొట్టేళ్ల ఫైట్