హైదరాబాద్ (Hyderabad) నగరాన్ని 2034 నాటికి నెట్ జీరో సిటీగా అభివృద్ధి చేయాలన్న మహత్తర లక్ష్యంతో తెలంగాణ ప్రభుత్వం ముందుకు సాగుతోందని సీఎం రేవంత్ రెడ్డి వెల్లడించారు. ముంబైలో నిర్వహించిన ‘క్లైమేట్ వీక్’ సదస్సులో పాల్గొన్న ఆయన, ప్రపంచ పర్యావరణ పరిరక్షణలో గ్రీన్ ఎనర్జీ పాత్ర అత్యంత కీలకమని స్పష్టం చేశారు. (Hyderabad) తెలంగాణ ప్రభుత్వం ఈ రంగానికి పూర్తి ప్రాధాన్యత ఇస్తోందని, భవిష్యత్ అభివృద్ధి దిశగా పచ్చ శక్తి వినియోగాన్ని వేగవంతం చేస్తున్నట్లు వివరించారు.
రాష్ట్రంలో గ్రామీణ ఆర్థిక వ్యవస్థను బలోపేతం చేయడంలో భాగంగా గ్రీన్ ఎనర్జీ వినియోగాన్ని ప్రోత్సహిస్తున్నామని సీఎం తెలిపారు. ప్రస్తుతం తెలంగాణలో 30 లక్షలకు పైగా వ్యవసాయ పంప్సెట్లు, దాదాపు 50 లక్షల గృహాలకు ఉచిత విద్యుత్ అందిస్తున్నామని వెల్లడించారు. బొగ్గు వంటి సంప్రదాయ ఇంధన వనరులపై ఆధారాన్ని తగ్గిస్తూ, సోలార్ మరియు ఇతర గ్రీన్ ఎనర్జీ వనరుల వైపు రాష్ట్రాన్ని మళ్లించడం ప్రభుత్వ ప్రధాన లక్ష్యమని పేర్కొన్నారు.
పట్టణాభివృద్ధి దిశగా హైదరాబాద్ కీలక అడుగు వేయబోతోందని ఆయన చెప్పారు. కార్బన్ ఫుట్ప్రింట్ ఆడిట్ చేపట్టనున్న తొలి భారత నగరంగా హైదరాబాద్ నిలవబోతోందని పేర్కొన్నారు. అలాగే వచ్చే ఐదేళ్లలో కోర్ అర్బన్ రీజియన్లో పరిశ్రమలు ఉండవని స్పష్టం చేస్తూ, నగరాన్ని పర్యావరణ అనుకూలంగా మార్చేందుకు ప్రత్యేక కార్యాచరణ చేపడుతున్నామని తెలిపారు.
దేశ ఆర్థిక ప్రగతిని ప్రస్తావిస్తూ, 1991 తర్వాత లిబరలైజేషన్, ప్రైవేటైజేషన్, గ్లోబలైజేషన్ సంస్కరణల వల్ల భారత్ సేవా రంగంలో బలంగా ఎదిగిందని సీఎం వ్యాఖ్యానించారు. అయితే తయారీ రంగం తగిన అవకాశాలను కోల్పోయిందని ఆయన అభిప్రాయపడ్డారు. కోవిడ్ అనంతరం ప్రభుత్వాల దృష్టి తయారీ, పర్యావరణ పరిరక్షణ, సుస్థిర అభివృద్ధిపై కేంద్రీకృతమైందని చెప్పారు.
తెలంగాణ అభివృద్ధి లక్ష్యాలపై మాట్లాడుతూ, రాష్ట్ర జీడీపీని 2034 నాటికి ఒక ట్రిలియన్ డాలర్లకు, 2047 నాటికి మూడు ట్రిలియన్ డాలర్లకు తీసుకెళ్లడమే లక్ష్యమని సీఎం ప్రకటించారు. ఇందుకోసం రాష్ట్రాన్ని క్యూర్, ప్యూర్, రేర్ జోన్లుగా విభజించినట్లు వివరించారు. ఓఆర్ఆర్, ట్రిపుల్ ఆర్ మధ్య ప్రాంతాన్ని ప్రధాన తయారీ కేంద్రంగా అభివృద్ధి చేసి “చైనా +1” ప్రత్యామ్నాయంగా తెలంగాణను నిలబెట్టాలన్నదే ప్రభుత్వ ఉద్దేశమన్నారు.
ప్రస్తుతం రాష్ట్రంలో రోజువారీ విద్యుత్ వినియోగం సగటున 16,610 మెగావాట్లు కాగా, ఈ ఏడాది గరిష్ట డిమాండ్ 19,000 మెగావాట్లను దాటే అవకాశముందని అంచనా వేశారు. రాష్ట్ర విద్యుత్ ఉత్పత్తిలో సుమారు 25 శాతం ఇప్పటికే గ్రీన్ సోర్సుల నుంచే వస్తోందని సీఎం వెల్లడించారు. మొత్తంగా హైదరాబాద్ను పర్యావరణానికి అనుకూలమైన ఆధునిక నగరంగా తీర్చిదిద్దేందుకు ప్రభుత్వం దృఢ సంకల్పంతో ముందుకు సాగుతోంది.
Also read: