Revanth : టీచర్లు బాగా పనిచేస్తేనే రెండోసారి సీఎం అవుతా

తెలంగాణ ముఖ్యమంత్రి రేవంత్ రెడ్డి (Revanth) మరోసారి స్పష్టంచేశారు – తన రాజకీయ భవిష్యత్తు, ముఖ్యంగా రెండోసారి ముఖ్యమంత్రిగా అవతరించడమా లేదా అనేది విద్యా రంగంపై ఆధారపడి ఉంటుందని. ఢిల్లీలో ఆమ్ ఆద్మీ పార్టీ అధినేత కేజ్రీవాల్ విద్యా అభివృద్ధి ద్వారా రెండోసారి సీఎం అయ్యారని గుర్తుచేసిన ఆయన, “టీచర్లు బాగా పని చేస్తే నేనూ రెండోసారి సీఎం అవుతాను. టీచర్లతోపాటు నేనూ కష్టపడతాను” అని వ్యాఖ్యానించారు.

ఈ సందర్భంగా పరోక్షంగా మాజీ సీఎం కేసీఆర్‌పై కూడా సెటైర్లు వేశారు. “నేను ఫామ్ హౌస్‌లో పడుకుంటా, మళ్లీ సీఎంను చేయండి అని అనడం లేదు” అంటూ చురకలు వేశారు. విద్యాభివృద్ధి కోసం టీచర్లు ఎక్కడికి పిలిచినా తాను అక్కడికి వెళ్ళేందుకు సిద్ధంగా ఉంటానని అన్నారు.ప్రస్తుతం ప్రభుత్వం, టీచర్ల కృషి ఫలితంగా రాష్ట్రంలో 3 లక్షల మంది కొత్తగా ప్రభుత్వ పాఠశాలల్లో చేరారని సీఎం(Revanth) వెల్లడించారు. ప్రైవేట్ స్కూల్ టీచర్ల కంటే ప్రభుత్వ టీచర్లకే ఎక్కువ నైపుణ్యం ఉందని ఆయన ప్రశంసించారు.

వివాదాస్పదమని కొందరు సూచించినప్పటికీ, విద్యాశాఖను తన వద్దే ఉంచుకున్నానని రేవంత్ తెలిపారు. విద్యా రంగంలో విప్లవాత్మక సంస్కరణలు అవసరమని, తెలంగాణకు నూతన విద్యా విధానం రూపుదిద్దాలని అన్నారు. ఇటీవలే కొత్త టీచర్ల నియామకాలు జరిపినట్లు, ఎన్నో ఏళ్లుగా పెండింగ్‌లో ఉన్న ప్రమోషన్లు కూడా పరిష్కరించినట్లు గుర్తు చేశారు.గత పదేళ్లలో విద్యను వ్యాపారంగా మార్చి సొమ్ము చేసుకున్నారని మాజీ ప్రభుత్వంపై విమర్శలు చేశారు. వారు మళ్లీ అధికారంలోకి వచ్చి ఉంటే ఉస్మానియా, కాకతీయ విశ్వవిద్యాలయాలు ఉనికిని కోల్పోయేవని హెచ్చరించారు. తెలంగాణలో గురుపూజోత్సవం జరిగినా గతంలో ఒక్కసారైనా సీఎం వచ్చారా అని ప్రశ్నించారు.

ఉపాధ్యాయులను చిన్నచూపు చూడబోమని సీఎం స్పష్టం చేశారు. తెలంగాణ రాష్ట్ర సాధనలో టీచర్ల పాత్ర కీలకమని గుర్తు చేశారు. ప్రతి గ్రామానికీ జై తెలంగాణ నినాదాన్ని తీసుకెళ్లింది ఉపాధ్యాయులే అని, జయ జయహే తెలంగాణ గీతాన్ని ఆలపించేలా చేసిన వారే అని అన్నారు.వసతిగృహాల్లో ఆహార విషబాధ ఘటనలు చూస్తే తాను బాధపడుతున్నానని సీఎం తెలిపారు. ఇక నుంచి టీచర్లు కూడా విద్యార్థులతో పాటు భోజనం చేస్తే వారికి ఆత్మస్థైర్యం కలుగుతుందని సూచించారు. “నిరుపేదల తలరాతలు మార్చేది చదువు ఒక్కటే” అని సీఎం రేవంత్ రెడ్డి స్పష్టం చేశారు.

తెలంగాణ పునర్నిర్మాణంలో టీచర్ల సహకారం అత్యవసరమని, ప్రజా ప్రభుత్వ లక్ష్యాన్ని సాధించడంలో ఉపాధ్యాయులు భుజం కలిపి నిలబడాలని సీఎం పిలుపునిచ్చారు.