Raghunandan Rao : దుబ్బాక నియోజకవర్గంలోని ప్రతి దళిత కుటుంబానికి దళిత బంధు, ఇంటి స్థలమున్న ప్రతి కుటుంబానికి రూ.7.50 లక్షలు మంజూరు చేస్తే రానున్న ఎన్నికల్లో పోటీ చేయనని మంత్రి కేటీఆర్కు ఎమ్మెల్యే రఘునందన్రావు సవాల్ విసిరారు. సిద్దిపేట జిల్లా దుబ్బాక పట్టణ పరిధిలోని చెల్లాపూర్ వార్డులో ప్రజా గోస- బీజేపీ భరోసా కార్నర్ మీటింగ్ నిర్వహించారు. ఈ కార్యక్రమంలో ఆయన మాట్లాడుతూ టీఆర్ఎస్ ప్రభుత్వం ఏర్పడి ఎనిమిదేండ్లు గడుస్తున్నా ప్రజలకిచ్చిన హామీలను ఒక్కటీ పూర్తి చేయలేదని ఆరోపించారు.
దుబ్బాక నియోజకవర్గానికి నిధులు మంజూరు చేస్తే రఘునందన్రావుకు ఎక్కడ మంచి పేరు వస్తుందోనని నిధులు ఇవ్వడంలేదని విమర్శించారు. ఎనిమిదేండ్లుగా నియోజకవర్గంలో అడుగు పెట్టని నాయకులు.. రఘునందన్రావు గెలవగానే ఎందుకొస్తున్నారని ప్రశ్నించారు. ప్రొసీడింగ్స్ లేకుండా కుల సంఘాల భవనాలకు ఆగమేఘాల మీద వచ్చి కొబ్బరికాయలు కొట్టడడం దేనికి సంకేతమన్నారు. అసెంబ్లీ సమావేశాల్లో ప్రభుత్వాన్ని ప్రశ్నిస్తే మంత్రి కేటీఆర్ ఎగతాళి చేయడం ఆయన అవివేకానికి నిదర్శనమన్నారు.
రఘునందన్ రావును ఎలా ఓడగొట్టాలని జిమ్మిక్కులు చేస్తున్నారని, నియోజకవర్గంపై నిజమైన ప్రేమ ఉంటే ప్రతి దళిత కుటుంబానికి దళిత బంధు, సొంత జాగలో ఇళ్లు నిర్మించుకునే లబ్ధిదారులకు రూ.7.50 లక్షలు ఇస్తే తానే రానున్న ఎన్నికల్లో పోటీ నుంచి తప్పుకుని కేటీఆర్కు దండ వేసి దండం పెడుతానని స్పష్టం చేశారు. తానెక్కడికి వెళ్లినా దళిత బంధు, డబుల్ బెడ్రూం ఇండ్లు ఇప్పించాలని లక్షలాది విజ్ఞప్తులు వస్తున్నాయని తెలిపారు. ఇచ్చిన హామీలను నెరవేర్చలేనోళ్లు ఏ మొఖం పెట్టుకుని రాష్ట్రంలో పర్యటిస్తారని ఎద్ధేవా చేశారు.