తెలుగు సినీ పరిశ్రమలో ఓ వెలుగు వెలిగిన నటుడు, అపారమైన నటనా ప్రతిభ కలిగిన వ్యక్తి, (Kota Srinivasa Rao) కోట శ్రీనివాసరావు ఈ లోకాన్ని విడిచి వెళ్లిపోయిన వార్త ఎంతో మందిని దిగ్భ్రాంతికి గురి చేసింది. ఆయన భౌతికకాయను సందర్శించేందుకు హైదరాబాద్లో ఆయన నివాసానికి వచ్చిన నటుడు బాబు మోహన్ కన్నీటి పర్యంతమయ్యారు. అక్కడ ఆయన (Kota Srinivasa Rao) కోటతో ఉన్న అనుబంధాన్ని గుర్తు చేసుకుంటూ మీడియాతో మాట్లాడారు.
“మేమిద్దరం కేవలం సహనటులే కాదు, సొంత అన్నదమ్ముల్లా ఉండేవాళ్లం. ఎంతో కాలంగా మా మధ్య గాఢమైన అనుబంధం ఉంది. సంతోషాలయినా, విషాదాలయినా – ప్రతి సందర్భంలో కూడా మేము ఒకరినొకరం మరిచేదిలేదు. రెండు రోజుల కిందటే ఫోన్లో మాట్లాడాం. ‘ఇంటికి వస్తాను అన్నావు కదా, మళ్లీ చూసుకోవాలి’ అన్నాడు. కానీ నేను రాకముందే ఆయన వెళ్లిపోయారు. ఈ వార్త నన్నెంతో కలిచివేసింది. నమ్మలేకపోతున్నా,” అంటూ బాబు మోహన్ భావోద్వేగంతో కళ్లు చెమర్చారు.
కోట శ్రీనివాసరావు సినిమాల్లో తన విలక్షణమైన అభినయంతో కోట్లాది మంది ప్రేక్షకుల గుండెల్లో చెరగని ముద్ర వేసారు. హాస్యం, ఖల నటుడు, గంభీరత, నాటకీయత – అన్నింటికీ ఆయన ముఖచిత్రంగా నిలిచారు. అలాంటి వ్యక్తిని కోల్పోవడం అంటే ఒక యుగాన్నే కోల్పోయినట్టే అని బాబు మోహన్ అన్నారు.
“నిజంగా ఈ రోజు రెండు తెలుగు రాష్ట్రాల ప్రజలకన్నా నాకు కోట మరణం ఎంతో దురదృష్టకరమైన విషయంగా అనిపిస్తోంది. ఎందుకంటే మా స్నేహం వెనక వ్యక్తిగత అనుబంధాలూ ఉన్నాయి. మేమిద్దరం కలిసి ఎందరో దర్శకులతో, ఎంతో మందితో కలిసి పని చేశాం. తెరపై నటులం అయినా తెర వెనుక మాత్రం మేము సోదరుల్లా జీవించాం. ఆయన లేకుండా ఇక సినిమాలు, వ్యక్తిగత జీవితం ఊహించుకోలేను,” అన్నారు బాబు మోహన్.
కోట శ్రీనివాసరావు జీవితం ఒక ఉద్యమంలాంటిదని, ఆయన స్థానం భర్తీ చేయలేనిదని తెలుగుసినిమా అభిమానులు భావిస్తున్నారు. ఆయన గొప్పతనాన్ని గుర్తు చేసుకుంటూ – సినీ ప్రముఖులు, అభిమానులు నివాళులర్పిస్తున్నారు.
Also read: