Malla Reddy:అఫిడవిట్లు ఆగమాగం మంత్రులు మల్లారెడ్డి

మంత్రులు మల్లారెడ్డి(Malla Reddy), పువ్వాడపై ఈసీకి ఫిర్యాదు
= మూడు కాలేజీల్లో ఇంటర్ చదివినట్టు పేర్కొన్న మల్లారెడ్డి
= రెండు పెండిళ్ల విషయాన్ని పేర్కొనని మాగంటి గోపీనాథ్
= ప్రిస్రైబ్ డ్ ఫార్మాట్ లో అపిడవిట్ ఇవ్వని మంత్రి పువ్వాడ
= జాబ్ కు రాజీనామా చేయకుండానే అలంపూర్ బీఆర్ఎస్ క్యాండిడేట్ నామినేషన్
= గత టర్మ్ లో కేసుల పాలైన 19 మంది ఎమ్మెల్యేలు
= గద్వాల ఎమ్మెల్యే బండ్ల కృష్ణమోహన్ రెడ్డి, కొత్తగూడె ఎమ్మెల్యే వనమాపై అనర్హత
= సుప్రీంకోర్టును ఆశ్రయించి స్టే తెచ్చుకున్న ఈ ఇద్దరు..
= ఈ సారి ఏం జరుగుతోందోనని అభ్యర్థుల్లో టెన్షన్
హైదరాబాద్: ఎన్ని జాగ్రత్తలు తీసుకున్న నామినేషన్ తో పాటు సమర్పించే అఫిడవిట్లలో తప్పులు దొర్లుతూనే ఉన్నాయి. అధికార బీఆర్ఎస్ తెలంగాణ భవన్ లో లీగల్ టీమ్ ను ఏర్పాటు చేసి మరీ నామినేషన్ పత్రాలు పూర్తి చేయించినా.. ఈ సారి ఇబ్బందులు తప్పేలా లేవు. గత టర్మ్ లో 19 మంది ఎమ్మెల్యేల అఫిడవిట్లలో దొర్లిన తప్పులు కోర్టు మెట్లెక్కించిన విషయం తెలిసిందే. వారిలో గద్వాల ఎమ్మెల్యే బండ్ల కృష్ణమోహన్ రెడ్డి, కొత్తగూడెం ఎమ్మెల్యే వనమా వెంకటేశ్వరరావుపై అనర్హత వేటు సైతం పడింది. దీంతో వారు సుప్రీంకోర్టను ఆశ్రయించి ఉపశమనం పొందారు. ఈ సారి మంత్రి మల్లారెడ్డి (Malla Reddy)తన అఫిడవిట్ లో ఇంటర్మీడియట్ చదివినట్టు చూపించారు. 2014 లో ఒక కాలేజీలో ఇంటర్ చదివినట్టు.. 2018 అఫిడవిట్ లో మరో కాలేజీలో, 2023లో (ప్రస్తుతం) ఇంకో కాలేజీలో ఇంటర్మీడియట్ చదువుకున్నట్టు పేర్కొన్నారు. 2014లో ఎంపీగా పోటీ చేసినప్పుడు మల్లారెడ్డి ఇచ్చిన అఫిడవిట్‌లో ఆయన ప్యాట్నీలోని ప్రభుత్వ కాలేజీలో 1973లో ఇంటర్ చదివినట్లు తెలిపారు. 2018లో మేడ్చల్ ఎమ్మెల్యేగా పోటీచేసినప్పుడు సికింద్రాబాద్ వెస్లీ కాలేజీవలో 1973లో ఇంటర్ చదివినట్లు పేర్కొన్నారు. 2023లో మేడ్చల్ నుంచి పోటీ చేస్తున్న సందర్భంగా ఇచ్చిన అఫిడవిట్‌లో ఆయన రాఘవ లక్ష్మీదేవి గవర్నమెంట్ కాలేజీలో 1973లో ఇంటర్ చదివినట్లు తెలిపారు. మల్లారెడ్డి (Malla Reddy)ఇంటర్ చదివింది 1973లోనే అని 3 అఫిడవిట్లూ చెబుతున్నాయి. కానీ.. 3 కాలేజీల్లో చదవడమేంటి? ఇదెలా సాధ్యమైంది? అన్న ప్రశ్న తలెత్తుతోంది. పువ్వాడ అజయ్ అఫిడవిట్ లో లోపాలను కాంగ్రెస్ అభ్యర్థి తుమ్మల నాగేశ్వరరావు ఎత్తి చూపుతున్నారు. ఆయన దాఖలు చేసిన అఫిడవిట్ ప్రిస్క్రైబ్ డ్ ఫార్మాట్ లో లేదంటున్నారు. కాలమ్ లను మార్చేశారని చెబుతున్నారు. ఇదిలా ఉండగా జూబ్లీ హిల్స్ ఎమ్మెల్యే మాగంటి గోపీనాథ్ కు ఇద్దరు భార్యలున్నారు. ఆ విషయం అఫిడవిట్ లో ప్రస్తావించకపోవడడం గమనార్హం. అలంపూర్ నుంచి బరిలోకి దిగుతున్న బీఆర్ఎస్ అభ్యర్థి విజయుడు ఉపాధి హామీ పథకం లో ఉద్యోగం చేస్తున్నారు. ఆయన తన ఉద్యోగానికి రాజీనామా చేయకుండానే నామినేషన్ దాఖలు చేశారు. దీంతో ఆయన అఫిడవిట్ పైనా ఈసీకి ఫిర్యాదులు వెళ్లాయి.
గతంలో 19 మందిపై కేసులు
గత శాసనసభలో 19 మంది అభ్యర్థులు ఎలక్షన్ కేసులు ఎదుర్కొన్నారు. వీరిలో మంత్రులు శ్రీనివాస్ గౌడ్, గంగుల కమలాకర్ సైతం ఉండటం గమనార్హం. కొత్తగూడెం ఎమ్మెల్యే వనమా వెంకటేశ్వరరావు, గద్వాల ఎమ్మెల్యే బండ్ల కృష్ణమోహన్ రెడ్డిపై ఏకంగా అనర్హత వేటు పడింది. అయితే వాళ్లు సుప్రీంకోర్టను ఆశ్రయించడంతో తాత్కాలిక ఉపశమనం లభించింది. అంతలోనే శాసన సభ రద్దు కావడం గమనార్హం.