SUMMER:ఆరోగ్య ప్రదాయిని తాటిముంజ

వేసవి(SUMMER) వచ్చిందంటే చాలు ఊష్ణ తాపానికి ఉపశమనం కోసం చూస్తుంటాం. ఆ తాపం నుంచి కాస్తా రిలీఫ్ ఇచ్చేవి తాటి ముంజలు. హైదరాబాద్ మహా నగరంలో తాటిముంజలు అందుబాటులో ఉన్నాయి. హైదరాబాద్ లో పలు ప్రాంతాల్లో ముంజల అమ్మకాలు ఊపందుకున్నాయి. పెద్ద ఎత్తున ప్రజలు తాటి ముంజలు కొనేందుకు ఆసక్తి చూపుతున్నారు. తాటి ముంజలు తింటే ఆరోగ్యానికి ఎన్నో ఉపయోగలున్నాయని, వేసవి (SUMMER) తాపం నుంచి ఉపశమనం కలుగుతుందని విక్రేతలు చెబుతున్నారు. కొనేవారు కూడా అది నిజమే నంటున్నారు. కేవలం వేసవిలో మాత్రమే ఇవి విరివిగా లభిస్తాయి. గ్రామాల్లో తాటిచెట్లు ఎక్కువగా ఉంటాయి కాబట్టి అక్కడ ముంజలు విరివిగా దొరుకుతుంటాయి. నగరాల్లో ఎక్కువ ధర పెట్టి కొనుగోలు చేయాల్సి ఉంటుంది.

వైద్యులేమంటున్నారంటే..
తాటి ముంజలతో ఎన్నో ఆరోగ్య ప్రయోజనాలు ఉన్నాయని వైద్య నిపుణులు సూచిస్తున్నారు. తాటి ముంజలు శరీరంలో వేడిని తగ్గించి శరీరాన్ని హైడ్రేట్ గా ఉంచుతాయి. తాటి ముంజలు తినడం వల్ల మలబద్ధకం సమస్యలు తొలగిపోయి వ్యాధి నిరోధక శక్తి పెరుగుతుంది. తాటి గింజలు క్యాన్సర్ కణాలను కూడా నివారిస్తాయని వైద్యులు అంటున్నారు. ముంజల్లో ఐరన్‌, క్యాల్షియం పుష్కలంగా ఉంటాయని చెబుతున్నారు. విటమిన్‌ ఏ, బీ, సీలతో పాటు జింక్‌, పొటాషియం, పాస్ఫరస్‌లు కూడా అధికంగా ఉంటాయని వైద్యులు సెలవిస్తున్నారు. వేసవిలో రోజూ తాటి ముంజలు తింటే వడదెబ్బ తగలనీయకుండా బయటపడవచ్చని చెబుతున్నారు. గర్భిణుల జీర్ణక్రియను ముంజలు మెరుగుపరుస్తాయంటున్నారు. ఎసిడిటీ సమస్యలను దూరం చేస్తాయని చెబుతున్నారు.అందుకే ఇంకెందుకు ఆలస్యం వెంటనే వెళ్లి మనమూ తాటి ముంజలు తినేద్దామా..?