మహారాష్ట్ర రాజకీయాల్లో మరో కీలక మలుపు తిరిగే సూచనలు కనిపిస్తున్నాయి. దేశంలోనే అతిపెద్ద మున్సిపల్ కార్పొరేషన్గా పేరుగాంచిన బృహణ్ ముంబై మున్సిపల్ కార్పొరేషన్ (బీఎంసీ) ఎన్నికల నేపథ్యంలో రాజకీయ వాతావరణం వేడెక్కుతోంది. ఈ క్రమంలో (Shiv Sena) శివసేన (యూబీటీ) మరియు మహారాష్ట్ర నవనిర్మాణసేన (ఎంఎన్ఎస్) కలిసి ఎన్నికల్లో పోటీ చేయనున్నట్లు శివసేన (Shiv Sena) సీనియర్ నేత అనిల్ పరాబ్ చేసిన ప్రకటన రాజకీయ వర్గాల్లో హాట్ టాపిక్గా మారింది.వచ్చే బీఎంసీ ఎన్నికల్లో బీజేపీని ఎదుర్కోవడమే ప్రధాన లక్ష్యంగా శివసేన (యూబీటీ) మరియు ఎంఎన్ఎస్ మధ్య పొత్తు కుదిరే అవకాశాలు బలంగా కనిపిస్తున్నాయని అనిల్ పరాబ్ వెల్లడించారు. ఇప్పటికే ఈ రెండు పార్టీల అగ్రనాయకుల మధ్య చర్చలు కొనసాగుతున్నాయని, ఈ అంశంపై ఎప్పుడైనా అధికారిక ప్రకటన వెలువడే అవకాశం ఉందని ఆయన తెలిపారు. ముంబై రాజకీయాల్లో శివసేనకు ఉన్న సంప్రదాయ బలం, రాజ్ థాకరే నాయకత్వంలోని ఎంఎన్ఎస్కు ఉన్న మరాఠీ ఓటు బ్యాంక్ కలిసి వస్తే బీజేపీకి గట్టి సవాల్ ఎదురవుతుందని రాజకీయ విశ్లేషకులు అంచనా వేస్తున్నారు.
ఈ పొత్తు కేవలం రెండు పార్టీలకే పరిమితం కాకుండా కాంగ్రెస్ను కూడా భాగస్వామిగా చేసేందుకు ప్రయత్నాలు జరుగుతున్నాయని అనిల్ పరాబ్ స్పష్టం చేశారు. బీజేపీని ఓడించాలంటే విపక్షాలన్నీ ఒక్కటిగా రావాల్సిన అవసరం ఉందని ఆయన అభిప్రాయపడ్డారు. అయితే ఈ విషయంలో కాంగ్రెస్ నుంచి మిశ్రమ స్పందన కనిపిస్తోంది.ఇదే అంశంపై శివసేన (యూబీటీ) ఎంపీ సంజయ్ రౌత్ కూడా కీలక వ్యాఖ్యలు చేశారు. శివసేన–ఎంఎన్ఎస్ మధ్య కూటమి రెండు నుంచి మూడు రోజుల్లో కార్యరూపం దాల్చే అవకాశం ఉందని ఆయన తెలిపారు. అయితే, ఎంఎన్ఎస్ను కూటమిలో చేర్చడంపై కాంగ్రెస్ అభ్యంతరం వ్యక్తం చేస్తోందని సంజయ్ రౌత్ పేర్కొన్నారు. అయినప్పటికీ, బీజేపీని ఓడించాలంటే విశాల కూటమి అవసరమని, ఈ విషయాన్ని కాంగ్రెస్ నాయకత్వానికి వివరించి ఒప్పించే ప్రయత్నాలు కొనసాగుతున్నాయని ఆయన అన్నారు.అయితే, కాంగ్రెస్ వైఖరి మాత్రం పూర్తిగా భిన్నంగా కనిపిస్తోంది. ఆల్ ఇండియా కాంగ్రెస్ కమిటీ ప్రధాన కార్యదర్శి, మహారాష్ట్ర ఇన్చార్జ్ రమేష్ చెన్నితల ఇటీవల నిర్వహించిన ప్రెస్మీట్లో బీఎంసీ ఎన్నికల్లో కాంగ్రెస్ ఒంటరిగానే పోటీ చేసే ఆలోచనలో ఉన్నట్లు స్పష్టం చేశారు. స్థానిక స్థాయిలో పార్టీ బలాన్ని పెంచుకోవడమే తమ లక్ష్యమని ఆయన వ్యాఖ్యానించారు. దీంతో శివసేన–ఎంఎన్ఎస్–కాంగ్రెస్ త్రికూటమి ఏర్పడుతుందా? లేక శివసేన–ఎంఎన్ఎస్ ద్విపాక్షిక పొత్తుకే పరిమితమవుతుందా? అన్నది ఉత్కంఠగా మారింది.
బృహణ్ ముంబై మున్సిపల్ కార్పొరేషన్ ఎన్నికలు జనవరి 15న జరగనున్నాయి. మరుసటి రోజే ఓట్ల లెక్కింపు చేపట్టి ఫలితాలు ప్రకటించనున్నారు. ముంబై నగర పాలనపై పట్టు సాధించేందుకు అన్ని ప్రధాన పార్టీలు వ్యూహాత్మకంగా అడుగులు వేస్తున్నాయి. గతంలో బీఎంసీపై శివసేన ఆధిపత్యం కొనసాగినప్పటికీ, రాజకీయ పరిణామాల నేపథ్యంలో పరిస్థితి పూర్తిగా మారిపోయింది.ఈ ఎన్నికలు కేవలం స్థానిక సంస్థ ఎన్నికలకే పరిమితం కాకుండా, మహారాష్ట్ర రాజకీయాల భవిష్యత్తును నిర్దేశించే ఎన్నికలుగా భావిస్తున్నారు. శివసేన (యూబీటీ)–ఎంఎన్ఎస్ పొత్తు ఖరారైతే మరాఠీ రాజకీయాల్లో కొత్త సమీకరణాలు ఏర్పడతాయని, బీజేపీకి గట్టి పోటీ ఎదురవుతుందని విశ్లేషకులు అభిప్రాయపడుతున్నారు. రానున్న రోజుల్లో ఈ పొత్తుపై అధికారిక ప్రకటన వెలువడితే మహారాష్ట్ర రాజకీయాల్లో మరో కీలక అధ్యాయం మొదలయ్యే అవకాశం ఉంది.
Also read: