హైదరాబాద్ శివారులోని (Suraram) సూరారం ప్రాంతంలో ఆదివారం అర్ధరాత్రి సంచలనాత్మక ఘటన చోటుచేసుకుంది. స్థానికంగా గుర్తింపు పొందిన (Suraram) కట్ట మైసమ్మ చెరువుకు సమీపంలోని మూలమలుపు వద్ద ఓ ఇనోవా కారు అదుపుతప్పి చెరువులోకి దూసుకెళ్లింది. ఈ ఘటన స్థానికుల్లో తీవ్ర ఆందోళన కలిగించింది.
ప్రత్యక్ష సాక్షుల ప్రకారం, ఇనోవా కారు అధిక వేగంతో వచ్చి బతుకమ్మ పండుగకు ఏర్పాటైన ఇనుపకంచను ఢీకొట్టి బద్దలుకొట్టింది. అనంతరం, అదుపు తప్పిన కారు నేరుగా చెరువులోకి దూసుకెళ్లింది. ఈ కారు లో ముగ్గురు వ్యక్తులు ఉన్నట్లు సమాచారం. ప్రమాదం జరిగిన వెంటనే వారు కారులో నుంచి బయటకు వచ్చి అక్కడి నుంచి పారిపోయారు. ఈ వ్యక్తుల వివరాలు ఇప్పటి వరకు తెలియరాలేదు.
చుట్టుపక్కల ఉన్న స్థానికులు వెంటనే పోలీసులకు సమాచారం అందించారు. ఘటనా స్థలానికి చేరుకున్న పోలీసులు సహాయక చర్యలు ప్రారంభించారు. స్పెషల్ క్లైన్ సాయంతో కారును చెరువులో నుంచి బయటకు తీశారు. ఈ క్రమంలో పోలీసులు కారును పరిశీలించారు. కారులో ఏమైనా మద్యం సీసాలు ఉన్నాయా? లేదా మరేదైనా శంకాస్పద వస్తువులున్నాయా అన్న కోణంలో దర్యాప్తు చేస్తున్నారు.
ఈ కారు స్థానిక వ్యాపారులదిగా పోలీసులు అనుమానిస్తున్నారు. అయితే, కారు పై ఉన్న రిజిస్ట్రేషన్ నంబర్ ఆధారంగా నిజమైన యజమానిని గుర్తించే పనిలో ఉన్నారు. కారులో ప్రయాణించిన ముగ్గురు వ్యక్తుల వివరాలను సేకరించే ప్రయత్నం కొనసాగుతోంది. చెరువులోకి దూసుకెళ్లిన విధానం చూస్తుంటే ఇది అనుకోకుండా జరిగిన ప్రమాదమా? లేక మద్యం మత్తులో జరిగిందా? అన్నది పోలీసుల దర్యాప్తులో తేలాల్సి ఉంది.
ప్రస్తుతం కట్ట మైసమ్మ చెరువు పరిసరాల్లో భద్రత పెంచారు. అటువైపు ప్రయాణించే వాహనదారులకు పోలీసులు అప్రమత్తం చేయడం ప్రారంభించారు. చెరువుల సమీపంలో రక్షణ కంచెలు బలపరిచే పనిని అధికారులు ప్రారంభించనున్నారు.
ఈ సంఘటన స్థానికంగా కలకలం రేపినప్పటికీ, ఎలాంటి ప్రాణనష్టం లేకుండా తప్పించుకోవడం ఆశ్చర్యాన్ని కలిగిస్తోంది. ఇలాంటివి మళ్లీ జరగకుండా స్థానిక ప్రజలు కూడా అధికారులను కోరుతున్నారు.
Also read: