వరంగల్‌లో జరిగిన తెలంగాణ (Telangana) రాజ్యాధికార పార్టీ రాష్ట్ర కమిటీ తొలి సమావేశం రాజకీయ వాతావరణాన్ని వేడెక్కించింది. ఈ సమావేశంలో పార్టీ అధినేత తీన్మార్ మల్లన్న పలు కీలక వ్యాఖ్యలు చేశారు. ముఖ్యంగా బీసీల సమస్యలు, (Telangana) తెలంగాణ చరిత్ర, భవిష్యత్ రాజకీయాలపై ఆయన చేసిన వ్యాఖ్యలు ప్రత్యేక చర్చనీయాంశమయ్యాయి.
మల్లన్న మాట్లాడుతూ, రాష్ట్ర ప్రభుత్వం బీసీలకు కనీసం లక్ష కోట్ల రూపాయల బడ్జెట్ కేటాయించాలని డిమాండ్ చేశారు. “ప్రభుత్వం చెబుతున్నట్టు బీసీలు 42% ఉన్నారని కాదు. ఎంత జనాభా ఉంటే అంత శాతం రిజర్వేషన్లు ఇవ్వాలి. బీసీల హక్కులు కాపాడేందుకు మా పార్టీ గళం విప్పుతుంది” అని ఆయన స్పష్టం చేశారు.
తాను కాంగ్రెస్ పార్టీని వీడి రాలేదని, పార్టీ యే తనను బయటకు పంపిందని మల్లన్న వ్యాఖ్యానించారు. “ఫిరాయింపులు చేసిన ఎమ్మెల్యేల అంశం ముగిసిన తర్వాత నా ఎమ్మెల్సీ పదవి గురించి ఆలోచిస్తాను. కానీ నా బాట మాత్రం ప్రజల కోసం ఉంటుంది” అని ఆయన తెలిపారు.
అలాగే తెలంగాణ రాష్ట్ర చరిత్రలో కీలకపాత్ర పోషించిన వ్యక్తులను గౌరవించాలని మల్లన్న విజ్ఞప్తి చేశారు. “తెలంగాణ జాతిపితగా జయశంకర్ సార్‌ను గుర్తించాలి. తెలంగాణ కోసం పోరాడిన కొండా లక్ష్మణ్ బాపూజీకి భారత రత్న ఇవ్వాలి” అని ఆయన డిమాండ్ చేశారు.
రాజకీయ వ్యాఖ్యలకూ మల్లన్న వెనుకాడలేదు. “కాంగ్రెస్ పార్టీ అనేది రేవంత్ రెడ్డి లేదా మహేశ్ కుమార్‌ది కాదు. అది జాతీయ పార్టీ. రేవంత్ రెడ్డి బీసీల ద్రోహి” అంటూ ఆయన మండిపడ్డారు. ఇంకా కాంగ్రెస్‌ను తమ పార్టీలో విలీనం చేసేందుకు సిద్ధమని మల్లన్న ప్రకటించడం ప్రత్యేకంగా గమనార్హం.
ప్రజా సంక్షేమానికి సంబంధించిన పలు హామీలను కూడా ఆయన ఇచ్చారు. “వరంగల్‌ను తెలంగాణ రెండో రాజధానిగా ప్రకటించాలి. భూమిలేని బీసీ కుటుంబాలకు రెండు ఎకరాల చొప్పున భూములు ఇవ్వాలి. ఇళ్లు లేని అగ్రవర్ణ పేదలకు ఇళ్లు కట్టి ఇవ్వాలి. ప్రతి ఒక్కరికీ కార్పొరేట్ స్థాయిలో ఉచిత విద్య, వైద్యం అందిస్తాం” అని ఆయన పేర్కొన్నారు.
ఈ వ్యాఖ్యలు సోషల్ మీడియాలో కూడా వైరల్ అవుతున్నాయి. ముఖ్యంగా బీసీలకు ప్రత్యేక ప్రాధాన్యత ఇవ్వడం, తెలంగాణ జాతిపితగా జయశంకర్ సార్ పేరు ప్రస్తావించడం, కొండా లక్ష్మణ్ బాపూజీకి భారత రత్న డిమాండ్ చేయడం వంటి అంశాలు ప్రజల్లో ఆసక్తి రేపుతున్నాయి.
వరంగల్‌ను రెండో రాజధానిగా చేయాలన్న మల్లన్న డిమాండ్‌పై చర్చలు మొదలయ్యాయి. హైదరాబాద్‌పై ఒత్తిడి తగ్గించడానికి రెండో రాజధాని అవసరం ఉందని కొందరు నెటిజన్లు వ్యాఖ్యానిస్తుండగా, ఈ ప్రతిపాదన అమలు సాధ్యాసాధ్యాలపై రాజకీయ విశ్లేషకులు చర్చిస్తున్నారు.
రాష్ట్ర రాజకీయాల్లో కొత్తగా అడుగుపెడుతున్న తెలంగాణ రాజ్యాధికార పార్టీ ఈ సమావేశంతోనే బలమైన సందేశం ఇచ్చింది. మల్లన్న వ్యాఖ్యలు, హామీలు, డిమాండ్లు వచ్చే రోజుల్లో తెలంగాణ రాజకీయ చర్చలకు దారితీసే అవకాశం ఉంది.
Also read: