మహారాష్ట్ర నుంచి తెలంగాణలోకి ప్రవేశించిన ఒక మగ పులి (Tiger) ప్రస్తుతం యాదాద్రి భువనగిరి జిల్లాలో తీవ్ర కలకలం సృష్టిస్తోంది. అడవుల్ని దాటి గ్రామాల సమీపానికి చేరుకుంటున్న ఈ (Tiger) పులి సంచారం అటవీ శాఖ అధికారులతో పాటు స్థానిక ప్రజలను అప్రమత్తం చేసింది. మహారాష్ట్ర యవత్మాల్ జిల్లాలోని తిప్పేశ్వర్ వన్యప్రాణి సంరక్షణ కేంద్రానికి చెందిన ఈ మగ పులి, తన భాగస్వామి అయిన ఆడ పులిని వెతుక్కుంటూ ఏకంగా సుమారు 400 కిలోమీటర్ల మేర ప్రయాణించి తెలంగాణలోకి ప్రవేశించడం విశేషంగా మారింది. ఐదు ఉమ్మడి జిల్లాల మీదుగా సాగిన ఈ ప్రయాణం వన్యప్రాణుల సహజ ప్రవర్తనకు నిదర్శనంగా నిలుస్తోంది.
అటవీ శాఖ అధికారులు తెలిపిన వివరాల ప్రకారం, ఈ మగ పులి కొన్ని నెలల క్రితం తెలంగాణలోని ఆదిలాబాద్ జిల్లా బోథ్ అటవీ ప్రాంతంలో తొలిసారిగా కనిపించింది. శీతాకాలం పులుల సంతానోత్పత్తికి అత్యంత అనుకూలమైన కాలం కావడంతో, జత కోసం వెతుకుతూ ఈ పులి తన ప్రయాణాన్ని కొనసాగించినట్లు అధికారులు అంచనా వేస్తున్నారు. ఆదిలాబాద్ నుంచి నిర్మల్, మంచిర్యాల, కామారెడ్డి, సిద్దిపేట జిల్లాల మీదుగా సాగుతూ చివరకు యాదాద్రి భువనగిరి జిల్లా అటవీ ప్రాంతాలకు చేరుకుంది. ఈ ప్రయాణం మొత్తం పులి అడవులు, వ్యవసాయ భూములు, గ్రామాల సరిహద్దులను దాటుకుంటూ సాగడం గమనార్హం.
వన్యప్రాణి నిపుణుల ప్రకారం, మగ పులులు భాగస్వామిని వెతుక్కునే సమయంలో రోజుకు సుమారు 25 నుంచి 30 కిలోమీటర్ల వరకు ప్రయాణించగల సామర్థ్యం కలిగి ఉంటాయి. సాధారణంగా పగటిపూట సురక్షిత ప్రాంతాల్లో విశ్రాంతి తీసుకుంటూ, సూర్యాస్తమయం తర్వాత వేట సాగిస్తాయి. ఈ పులి తన ప్రయాణంలో కవ్వాల్ టైగర్ రిజర్వ్ మీదుగా వెళ్లినప్పటికీ అక్కడ ఉన్న ఆడ పులులను కలవలేకపోయినట్లు అధికారులు భావిస్తున్నారు. అక్కడి ఆడ పులుల సంకేతాలను ఇది పసిగట్టలేకపోయి ఉండవచ్చని, లేదా అక్కడి పులులు ఈ మగ పులిని తిరస్కరించి ఉండవచ్చని అంచనా వేస్తున్నారు.
పులులు సాధారణంగా తమ ఉనికిని తెలియజేయడానికి చెట్లపై గోర్లతో గీతలు పెట్టడం, మూత్రం ద్వారా వాసనను వెదజల్లడం వంటి సంకేతాలను ఉపయోగిస్తాయి. ఈ సంకేతాల ద్వారా తమ శారీరక బలం, ఆధిపత్యాన్ని తెలియజేస్తూ భాగస్వామిని ఆకర్షిస్తాయి. బలమైన పులులనే ఆడ పులులు సాధారణంగా ఎంపిక చేసుకుంటాయని నిపుణులు చెబుతున్నారు. ఈ మగ పులి కూడా అదే సహజ ప్రవర్తనలో భాగంగానే ఈ సుదీర్ఘ ప్రయాణం చేస్తోందని అటవీ శాఖ భావిస్తోంది.
అయితే ఈ ప్రయాణంలో పులికి పలు ప్రమాదాలు ఎదురయ్యే అవకాశం ఉందని అధికారులు ఆందోళన వ్యక్తం చేస్తున్నారు. ముఖ్యంగా తెలంగాణ అటవీ ప్రాంతాల్లో వేటగాళ్లు అమర్చే విద్యుత్ తీగలు, ఉచ్చులు పులి ప్రాణాలకు ముప్పుగా మారే ప్రమాదం ఉందని హెచ్చరిస్తున్నారు. గతంలో 2024లో ‘జానీ’ అనే పులి కూడా సుమారు 300 కిలోమీటర్ల మేర ప్రయాణించి ప్రజల్లో భయాందోళనలు సృష్టించిన ఘటనను అధికారులు గుర్తు చేస్తున్నారు.
ప్రస్తుతం యాదాద్రి భువనగిరి జిల్లా పరిసర ప్రాంతాల్లో పులి సంచారంపై నిఘా పెంచినట్లు అటవీ శాఖ తెలిపింది. గ్రామాల ప్రజలు అప్రమత్తంగా ఉండాలని, ఒంటరిగా అటవీ ప్రాంతాల్లోకి వెళ్లవద్దని సూచించింది. పులి సహజంగా అడవుల్లోనే ఉండేలా అవసరమైన చర్యలు తీసుకుంటామని, ప్రజల భద్రతకు అత్యంత ప్రాధాన్యం ఇస్తామని అధికారులు స్పష్టం చేశారు.
Also read: