జిల్లాలో పెద్ద సంచలనం సృష్టించిన నిర్ణయం వెలువడింది. కోర్టు ఆదేశాలను ధిక్కరించినందుకు (Torur) తొర్రూర్ ఆర్డీవో కార్యాలయాన్ని అధికారులు ఇవాళ జప్తు చేశారు. జిల్లా ప్రధాన న్యాయమూర్తి ఆదేశాల మేరకు ఈ చర్య చేపట్టడం (Torur) జిల్లాలో చర్చనీయాంశంగా మారింది. సాధారణంగా ప్రభుత్వ కార్యాలయాలపై ఇలాంటి చర్యలు చాలా అరుదుగా జరుగుతాయి. కానీ, ఈ కేసులో కోర్టు ఆదేశాలను సకాలంలో అమలు చేయకపోవడంతో న్యాయస్థానం కఠిన నిర్ణయం తీసుకుంది.
రైతుల న్యాయ పోరాటం
దంతాలపల్లి మండలానికి చెందిన ముగ్గురు రైతులు — సాదు ధర్మారెడ్డి, కోరిపల్లి శ్రీనివాస్ రెడ్డి, కోరిపెల్లి వెంకన్న — గత రెండు దశాబ్దాలుగా న్యాయ పోరాటం చేస్తున్నారు. వారి వ్యవసాయ భూముల గుండా ఎస్సారెస్పీ (SRSP) కెనాల్‌ నిర్మాణం జరిగినప్పుడు వారికి అందిన పరిహారం తగినది కాదని భావించారు. 2000 సంవత్సరంలోనే పరిహారం పెంచాలంటూ కోర్టును ఆశ్రయించారు.
సంవత్సరాలు గడుస్తున్నా, వారి కేసు పరిష్కారం కాలేదు. ప్రభుత్వం ఇచ్చిన పరిహారం సరిపోకపోవడంతో వారు మళ్లీ జిల్లా కోర్టుకు వెళ్లారు. 2024లో ఈ కేసు విచారణ పూర్తయిన తర్వాత ప్రధాన న్యాయమూర్తి మహమ్మద్ అబ్దుల్ రఫీ రైతులకు తగిన నష్టపరిహారం చెల్లించాలంటూ స్పష్టంగా ఆదేశించారు.
కోర్టు ఆదేశాలను పాటించని అధికారులు
కోర్టు ఇచ్చిన స్పష్టమైన ఆదేశాలు ఉన్నప్పటికీ, తొర్రూర్ ఆర్డీవో కార్యాలయం వర్గాలు వాటిని అమలు చేయకుండా నిర్లక్ష్యం చూపినట్లు కోర్టు అభిప్రాయం వ్యక్తం చేసింది. రైతులకు నష్టపరిహారం చెల్లించడంపై ఎటువంటి చర్యలు తీసుకోకపోవడంతో వారు మళ్లీ కోర్టును ఆశ్రయించారు.
న్యాయస్థానం ఈ విషయాన్ని అత్యంత తీవ్రంగా పరిగణించింది. ప్రభుత్వ అధికారులు కోర్టు ఆదేశాలను అమలు చేయడం తప్పనిసరి అని, వాటిని ఉల్లంఘించడం చట్టపరమైన నేరమని స్పష్టం చేసింది. ఈ నేపథ్యంలోనే ఆర్డీవో కార్యాలయం జప్తు చేయాలంటూ ఆదేశాలు జారీ చేసింది.
ఆఫీస్‌ సీజ్‌ చర్య
జిల్లా జడ్జి ఆదేశాలతో అధికారులు ఈ రోజు తొర్రూర్ ఆర్డీవో కార్యాలయానికి వెళ్లి జప్తు ప్రక్రియను పూర్తి చేశారు. జప్తు అనంతరం కార్యాలయానికి తాళాలు వేసి, న్యాయస్థానం ఆధీనమేనని నోటీసులు అతికించారు. ఈ చర్యను చూసిన స్థానికులు, రైతులు ఆశ్చర్యపోయారు.
రైతుల స్పందన
రైతులు ఈ నిర్ణయాన్ని స్వాగతించారు.
“ఇరవై ఏళ్లుగా మేము న్యాయం కోసం పోరాడుతున్నాం. కోర్టు ఇచ్చిన ఆదేశాలను అధికారులు గౌరవించకపోవడం బాధాకరం. ఇప్పుడు అయినా మాకు న్యాయం జరుగుతుందనే నమ్మకం కలిగింది” అని రైతులు పేర్కొన్నారు.
ప్రభుత్వ వర్గాలు టెన్షన్‌లో
ఈ ఘటనతో జిల్లా పరిపాలనలో కలకలం చెలరేగింది. ఇతర అధికారులు కూడా కోర్టు ఆదేశాలపై మరింత జాగ్రత్తగా వ్యవహరిస్తున్నారని సమాచారం.
Also read: