(Yadagirigutta) యాదగిరిగుట్టలోని శ్రీలక్ష్మీనరసింహస్వామి దేవస్థానం వార్షిక బ్రహ్మోత్సవాలు అత్యంత వైభవంగా కొనసాగుతున్నాయి. తొమ్మిదో రోజు ఉత్సవాల్లో భాగంగా (Yadagirigutta) mయాదాద్రీశుడు శ్రీమహావిష్ణువు అలంకారంలో స్వర్ణ గరుడ వాహనంపై ఆలయ ప్రధాన తిరువీధుల్లో విహరించి భక్తులకు దర్శనమిచ్చారు. గరుడ వాహనంపై స్వామివారి అలంకారం ఆధ్యాత్మిక వైభవాన్ని ప్రతిబింబించింది.
పుష్పాలతో, వజ్ర వైఢూర్యాలతో, బంగారు ఆభరణాలతో అలంకరించబడిన స్వామివారు తిరువీధుల్లో ఊరేగుతుండగా భక్తులు హర్షధ్వానాలతో స్వాగతం పలికారు. ఈ అలంకార సేవతో బ్రహ్మోత్సవాల సందర్భంగా నిర్వహించిన ప్రత్యేక అలంకారాలు ముగిశాయని ప్రధానార్చకులు కాండూరి వెంకటాచార్యులు తెలిపారు. ఉత్సవాల్లో భాగంగా ప్రతి రోజూ స్వామివారి విభిన్న అవతారాల అలంకరణ భక్తులకు ఆధ్యాత్మిక అనుభూతిని అందించిందని పేర్కొన్నారు.
ప్రవచన కార్యక్రమంలో విష్ణుమూర్తి మహిమను అర్చకులు వివరించారు. సృష్టి స్థితి లయాలకు మూలం శ్రీమహావిష్ణువేనని, లోకంలో అధర్మం పెరిగినప్పుడు, దుష్టులు అధికమై ప్రజలు బాధపడినప్పుడు భగవంతుడు అవతారాలు ధరించి ధర్మ స్థాపన చేస్తాడని చెప్పారు. దుష్టులను శిక్షించి శిష్టులను రక్షించడమే అవతారాల ప్రధాన లక్ష్యమని వివరించారు. భక్తులను కాపాడటంలో విష్ణుమూర్తి పాత్ర అపారమని తెలిపారు.
ఈ మహత్తర అలంకార సేవతో బ్రహ్మోత్సవాల్లోని అలంకార కార్యక్రమాలు ముగిశాయని ప్రకటించారు. అయితే ఉత్సవాల సందడి ఇంకా కొనసాగుతూనే ఉంది. రాత్రి 9:30 గంటలకు లక్ష్మీనరసింహస్వామి దివ్యవిమాన రథోత్సవం నిర్వహించనున్నట్లు ఆలయ అధికారులు తెలిపారు. ఈ రథోత్సవాన్ని వీక్షించేందుకు పెద్ద సంఖ్యలో భక్తులు తరలివస్తున్నారు.
ఈ వేడుకల్లో ఎండోమెంట్ కమిషనర్ హనుమంతరావు, ఆలయ చైర్మన్ నరసింహమూర్తి, ఈవో భవానీ శంకర్, డిప్యూటీ ఈవో దోర్బల భాస్కర్, ఏఈవోలు గజవెల్లి రఘు, నవీన్ తదితరులు పాల్గొన్నారు. భక్తులతో కలిసి ఉత్సవాలను ఘనంగా నిర్వహించారు. యాదాద్రి బ్రహ్మోత్సవాలు ప్రతి ఏడాది వేలాది మంది భక్తులను ఆకర్షిస్తూ ఆధ్యాత్మిక వైభవాన్ని చాటుకుంటున్నాయి.
Also read: