(Operation Sindoor) పహల్గామ్లో జరిగిన ఉగ్రదాడిలో 28 మంది అమాయక పౌరులు ప్రాణాలు కోల్పోయిన దారుణ ఘటన భారత దేశాన్ని తీవ్రంగా కలిచివేసింది. ఈ సంఘటనకు తక్షణమే ప్రతిస్పందనగా భారత ప్రభుత్వం “ఆపరేషన్ సిందూర్” (Operation Sindoor)అనే కోడ్ నేమ్తో భారీ సైనిక చర్య చేపట్టింది. ఈ ఆపరేషన్లో భారత వైమానిక దళం ఖచ్చితమైన క్షిపణి దాడుల ద్వారా పాకిస్తాన్ మరియు పాక్ ఆక్రమిత కాశ్మీర్లోని తొమ్మిది కీలక ఉగ్రవాద శిబిరాలను లక్ష్యంగా చేసుకుంది.
ఈ దాడుల్లో ప్రముఖ ఉగ్రవాద సంస్థలైన జైష్-ఎ-మహమ్మద్, లష్కర్-ఎ-తోయ్బా శిబిరాలు ధ్వంసమయ్యాయి. భారత రక్షణ శాఖ ప్రకారం, ఈ చర్యలో 70 మందికి పైగా ఉగ్రవాదులు హతమయ్యారు. ఉగ్రవాద మౌలిక సదుపాయాలు పూర్తిగా నేలమట్టమయ్యాయి. ఈ దాడులను “Precision Airstrikes”గా అభివర్ణిస్తూ, భారత్ ఉగ్రవాదానికి మద్దతు ఇస్తున్న దేశాలకు గట్టి హెచ్చరిక పంపింది.
ఇదే సమయంలో పాకిస్తాన్ కూడా ప్రతీకార దాడుల ద్వారా ఐదు భారత యుద్ధ విమానాలను కూల్చివేశామని, భారత సైనిక బ్రిగేడ్ ప్రధాన కార్యాలయాన్ని ధ్వంసం చేసామని ప్రకటించింది. ఈ పరస్పర దాడుల్లో రెండు దేశాల సరిహద్దుల్లో పౌరుల ప్రాణనష్టం చోటుచేసుకుంది. పాక్ పక్షాన 9 మంది, భారత్ పక్షాన 8 మంది పౌరులు మరణించారని సమాచారం. అనేక మంది గాయపడ్డారు.
ఈ పరిస్థితుల కారణంగా సరిహద్దు ప్రాంతాల్లో ప్రజలు పెద్దఎత్తున తరలింపుకు గురవుతున్నారు. పలు గ్రామాలు ఖాళీ చేయించబడ్డాయి. సరిహద్దు రహదారులు మూసివేయబడ్డాయి. రెండు దేశాల సైన్యాలు అత్యంత అప్రమత్తంగా ఉండి, మరింత దాడులకు సిద్ధంగా ఉన్నాయి.
అంతర్జాతీయంగా ఈ ఉద్రిక్తతలు తీవ్ర చర్చకు దారి తీస్తున్నాయి. ఐక్యరాజ్యసమితి ప్రధాన కార్యదర్శి సహా పలు దేశాధినేతలు భారత్-పాకిస్తాన్ మధ్య ఉద్రిక్తతలు నివారించేందుకు సంయమనం పాటించాలని కోరుతున్నారు. ఒకవేళ ఈ ఘర్షణ ముదిరితే అది రెండు అణ్వాయుధ దేశాలకు తీవ్ర పరిణామాలు తలపెట్టి ప్రపంచ స్థాయిలో అశాంతికి దారి తీసే అవకాశం ఉందని ఆందోళన వ్యక్తమవుతోంది.
Also read: