దేశ రాజకీయాల్లో విమానాలు, హెలికాప్టర్ ప్రయాణాల గురించి వార్తలు వినగానే ప్రజల మనసుల్లో ఒక్కసారిగా గతంలోని (YSR Death) విషాద సంఘటనలు కళ్లముందు కదలాడుతాయి. ముఖ్యంగా రాజకీయ నేతల ప్రయాణాలకు సంబంధించిన చిన్న వార్త కూడా దేశవ్యాప్తంగా కలవరాన్ని రేపుతోంది. ఇందుకు కారణం గత కొన్ని దశాబ్దాలుగా భారత రాజకీయ చరిత్రలో చోటు చేసుకున్న పలు ఆకాశ ప్రమాదాలు ప్రజల జ్ఞాపకాలలో చెరగని ముద్ర వేసినవే. అలాంటి ఘటనల్లో అత్యంత విషాదకరమైనది 2009 సెప్టెంబర్ 2న నల్లమల అడవుల్లో జరిగిన (YSR Death) వైఎస్ రాజశేఖర రెడ్డి హెలికాప్టర్ ప్రమాదం.
ఆ రోజు ఉదయం నుంచి సాయంత్రం వరకు తెలుగు రాష్ట్రాల ప్రజలు అనుభవించిన ఆందోళన ఇప్పటికీ మరిచిపోలేనిది. ముఖ్యమంత్రి వైఎస్ రాజశేఖర రెడ్డి హెలికాప్టర్ కనిపించకపోవడంతో మొదలైన ఉత్కంఠ, చివరకు ఆయన మృతి వార్తతో శోకసంద్రంగా మారింది. ప్రజలతో మమేకమైన నాయకుడిని ఆకస్మికంగా కోల్పోవడం రాష్ట్ర రాజకీయాలకు తీరని లోటుగా మారింది. నల్లమల అడవుల్లో జరిగిన ఆ ప్రమాదం తెలుగు రాజకీయ చరిత్రలో ఎప్పటికీ గుర్తుండిపోయే దుర్ఘటనగా నిలిచింది.
వైఎస్సార్ ఘటనకు ముందే, 2002 మార్చి 3న లోక్సభ స్పీకర్ జీఎంసీ బాలయోగి హెలికాప్టర్ ప్రమాదంలో కైకలూరు సమీపంలో ప్రాణాలు కోల్పోవడం దేశ పార్లమెంటరీ చరిత్రను విషాదంలో ముంచింది. ఆకాశం నుంచి నేలరాలిన ఆ క్షణం దేశవ్యాప్తంగా రాజకీయ నేతల్లోనూ, ప్రజల్లోనూ తీవ్ర దిగ్భ్రాంతిని కలిగించింది. రాజ్యాంగ వ్యవస్థలో కీలక పదవిలో ఉన్న వ్యక్తి ఇలా మృతి చెందడం ప్రజాస్వామ్యానికి పెద్ద దెబ్బగా భావించబడింది.
తాజాగా కూడా హెలికాప్టర్ ప్రమాదాలు దేశాన్ని కుదిపేశాయి. 2021 డిసెంబర్ 8న తమిళనాడులోని కూనూర్ సమీపంలో జరిగిన హెలికాప్టర్ ప్రమాదంలో భారత తొలి చీఫ్ ఆఫ్ డిఫెన్స్ స్టాఫ్ జనరల్ బిపిన్ రావత్, ఆయన భార్యతో పాటు ఇతర సైనికాధికారులు మృతి చెందడం దేశ రక్షణ వ్యవస్థను తీవ్రంగా కలచివేసింది. ఈ ఘటన దేశవ్యాప్తంగా శోకాన్ని నింపింది. సైనిక రంగంలో అపార అనుభవం కలిగిన నాయకుడిని కోల్పోవడం జాతీయ భద్రతా వర్గాల్లో కూడా ఆందోళనను పెంచింది.
ఇవే కాకుండా 2011లో అరుణాచల్ ప్రదేశ్ ముఖ్యమంత్రి దోర్జీ ఖండూ హెలికాప్టర్ ప్రమాదంలో మృతి చెందడం, 2001లో మాధవరావు సింధియా విమాన ప్రమాదంలో ప్రాణాలు కోల్పోవడం, 1980లో సంజయ్ గాంధీ విమాన ప్రమాదంలో మృతి చెందడం వంటి ఘటనలు భారత రాజకీయ చరిత్రలో విషాద పుటలుగా మిగిలిపోయాయి. అంతకంటే ముందు 1945లో నేతాజీ సుభాష్ చంద్రబోస్ విమాన ప్రమాదంపై అధికారిక నివేదికలు ఉన్నప్పటికీ, ఇప్పటికీ అనేక సందేహాలు కొనసాగుతూనే ఉన్నాయి.
1965లో బల్వంత్రాయ్ మెహతా, 1973లో మోహన్ కుమారమంగళం, 1994లో సురేంద్ర నాథ్ వంటి ప్రముఖులు కూడా ఆకాశ ప్రమాదాల్లో ప్రాణాలు కోల్పోవడం ప్రజల్లో భయాన్ని మరింత బలపరిచింది. గత ఏడాది విజయ్ రూపానీపై వచ్చిన వార్తలు, ఇప్పుడు మహారాష్ట్ర ఉప ముఖ్యమంత్రి అజిత్ పవార్ ప్రయాణాలపై చక్కర్లు కొట్టిన ప్రచారాలు నిజానిజాల ధ్రువీకరణ ఎంత ముఖ్యమో మరోసారి గుర్తు చేస్తున్నాయి. ఈ తరహా వార్తలు ప్రజల్లో అనవసర ఆందోళనకు దారితీయకుండా బాధ్యతాయుత ప్రచారం అవసరమని నిపుణులు సూచిస్తున్నారు.
Also read: