తెలంగాణ (Telangana) ప్రభుత్వం ఒక కీలక నిర్ణయం తీసుకుంది. బనకచర్ల ప్రాజెక్టుపై రాష్ట్రం ఎదుర్కొంటున్న సమస్యలపై చర్చించేందుకు అఖిలపక్ష సమావేశాన్ని ఏర్పాటు చేసింది. (Telangana) ఈ మీటింగ్కు కేంద్ర మంత్రులు కిషన్ రెడ్డి, బండి సంజయ్ కుమార్, బీజేపీ, బీఆర్ఎస్, ఎంఐఎం ఎంపీలను ఆహ్వానించింది. దీనిపై నీటిపారుదల శాఖ మంత్రి ఉత్తమ్ కుమార్ రెడ్డి అధికారికంగా లేఖలు పంపారు.
ఈ సమావేశం ఎందుకు అవసరమైందంటే, ఆంధ్రప్రదేశ్ ప్రభుత్వం బనకచర్ల ప్రాజెక్టును నిర్మించేందుకు కేంద్ర జలశక్తి శాఖ వద్దకు ప్రతిపాదనలు పంపింది. అయితే ఈ ప్రాజెక్ట్ 1980 గోదావరి జల వివాద ట్రిబ్యునల్ అవార్డును, ఆంధ్రప్రదేశ్ పునర్వ్యవస్థీకరణ చట్టం 2014ను ఉల్లంఘించేలా ఉందని తెలంగాణ ప్రభుత్వం ఆరోపిస్తోంది.
మంత్రి ఉత్తమ్ కుమార్ రెడ్డి లేఖలో ఈ విషయాన్ని స్పష్టంగా పేర్కొన్నారు. ఈ ప్రాజెక్ట్ తెలంగాణ ప్రజల నీటి హక్కులను హరించే ప్రమాదం ఉందని, అందుకే ఈ అంశంపై అన్ని పార్టీలు కలసి చర్చించాల్సిన అవసరం ఉందని ఆయన అన్నారు.
తెలంగాణ ప్రభుత్వం ఇప్పటికే జనవరి 22, 2024న కేంద్రానికి లేఖ రాసింది. కేంద్ర జలశక్తి శాఖ స్పందిస్తూ, ఏపీ నుంచి ఇప్పటివరకు ఏ డీపీఆర్ (డిటైల్ ప్రాజెక్ట్ రిపోర్ట్) కూడా రాలేదని తెలిపింది. అయితే కేంద్రం అటు చెప్పినా, తెలంగాణ మాత్రం ఈ అంశాన్ని తీవ్రంగా తీసుకుంది.
ఈ సందర్భంగా మంత్రి ఉత్తమ్ కుమార్ రెడ్డి మాట్లాడుతూ, ముఖ్యమంత్రి రేవంత్ రెడ్డి ఇప్పటికే కేంద్ర జలశక్తి మంత్రి సీఆర్ పాటిల్ను కలసి ఈ అంశాన్ని వివరించారని తెలిపారు. అయినప్పటికీ కేంద్రం నుంచి సరైన స్పందన రాకపోవడంతో, ఈ అంశంపై అన్ని పార్టీలు కలసి ఒక్క మాట చెబుదామని ఈ అఖిలపక్ష సమావేశానికి పిలుపునిచ్చారు.
ఇది తెలంగాణ ప్రజల భవిష్యత్తుకు సంబంధించిన సమస్యగా మంత్రి పేర్కొన్నారు. నీటి హక్కులు రక్షించుకోవాలంటే అన్ని పార్టీలు కలిసి నిలబడాల్సిన సమయం ఇదేనన్నారు. ఈ భేటీలో ముఖ్యమంత్రి రేవంత్ రెడ్డి కూడా పాల్గొననున్నట్టు ఆయన వెల్లడించారు.
Also read: